Draakvrugkaaskoek met sjokoladebasis
Sjokoladekoeklaag
4 eiers, teen kamertemperatuur 160 ml strooisuiker
80 ml kakao
60 ml koekmeel
60 ml suurroom
Kaaskoek
230 g roomkaas, teen kamertemperatuur 100 ml klapperroom
100 g witsjokolade, gekap
160 ml draakvrugpuree (’n mengsel van wit en pienk)
10 ml vanieljegeursel
15 ml gelatien
30 ml koue water
250 ml room
45 ml strooisuiker
Gesnipperde draakvrug en eetblare blommetjies, om te versier
Voorverhit die oond tot 190 °C en smeer ’n stewige losboom-veerklampkoekpan van 24 cm goed met botter. Klits die eiers en suiker baie goed saam vir ongeveer 10 minute tot dit verdriedubbel het in volume. Sif die kakao en koekmeel oor en vou dit versigtig by die eiermengsel in. Klits die suurroom tot glad en vou dit ook by die beslag in. Skep die beslag in die voorbereide pan en bak vir 20-25 minute tot deurgaar.
Haal uit die oond en laat in die pan afkoel tot kamertemperatuur.
Kaaskoek: Klop die roomkaas in ’n bak tot glad en sonder klonte. Verhit die klapperroom en witsjokolade saam oor lae hitte tot die sjokolade gesmelt en die mengsel glad is. Voeg dit by die roomkaas en klits deur tot glad. Roer die draakvrugpuree en vanieljegeursel by. Sprinkel die gelatien oor die koue water en laat staan vir 5 minute om te spons. Smelt die gelatienmengsel in die mikrogolfoond (wees net versigtig dat dit nie kook nie – dit moet ’n helder, gladde vloeistof wees). Voeg die gelatienmengsel by die roomkaasmengsel en meng goed. Klits die room en strooisuiker saam styf en vou dit by die roomkaasmengsel in. Skep die kaaskoekmengsel op die gaar sjokoladebasis en smeer gelyk. Bedek en verkoel oornag. Sny en sit voor as nagereg of met koffie. Lewer 8-10 porsies.