Soutvarkboud in klapperroom op gekruide basmatirys
Pleks van die tradisionele manier om die varkvleis in aftreksel te posjeer en dan met ’n soet glaseersel te bestryk voor dit gerooster word, het ek het heel snit oornag teen baie lae hitte in ’n geurige klapperroomsous gebak. Die effe soet, romerige en titseltjie Oosterse geur wat dit die varkvleis gee, is onbeskryflik lekker.
1 middelslag- gerookte soutvarkboud ( sonder been
2 blikke (420 g elk) klapperroom
Water
1 heel knoffelbol, middeldeur gesny
1 duimgrootte stuk vars gemmer, in dun skyfies gesny 5 ml heel pienk peperkorrels
5 ml komyn
Hand vol vars koljanderblare
Gekruide basmatirys
4 x 250 ml gaar basmatirys, gestoom tot lig 30 ml fyngekapte, vars koljander
60 ml fyngekapte, vars platblaarpietersielie 30 ml fyngekapte, vars kruisement Sojasous en vars suurlemoensap na smaak
Soutvarkboud: As die soutvarkboud in ’n vleisnet is, haal dit uit en sit die vleis in ’n oondvaste swaarboomkastrol waarin die vleis knus pas, maar met genoeg ruimte om ’n deksel te kan opsit sonder dat dit aan die vleis raak. Voeg die klapperroom by. Maak een van die blikke vol water en voeg dit ook by. Voeg nou die knoffel, gemmer, peperkorrels, komyn en koljanderblare by en bedek die kastrol. (Die vloeistof moet die boud verkieslik heeltemal bedek.) Sit die kastrol in die oond en stel die oond op 140 °C. Bak die boud stadig vir ongeveer 6 uur of tot dit baie sag is. Haal die kastrol uit die oond en laat die boud vir minstens 30 minute in die sous afkoel. Haal die boud uit die sous en sny dun. Sit die kastrol op ’n stoofplaat en verhit die sous tot kookpunt. Kook vinnig tot die kookvloeistof ingedamp en dik genoeg is om as vleissous te gebruik. Giet deur ’n sif in ’n sousbeker.
Basmatirys: Meng die gaar rys met die drie soorte kruie en geur na smaak met sojasous en vars suurlemoensap. Skep ’n bed van die rys op ’n opdienbord. Rangskik die skywe sagte soutvarkboud daarop. Bedruip met ’n bietjie van die sous en rond af met vars koljanderblare. Lewer 6-8 porsies.