ROSSOUW CILLIÉ WORTELBOER

VINNIGE VRAE

By Laastedrif Agri boer julle met vrugte en verskeie groentesoorte. Hoe pas wortels by die res van jou boerdery in?

Wortels is ’n goeie gewas wat op praktiese vlak baie goed by ons boerdery inskakel. Ons kan dit heeljaar verbou danksy ons plase in twee geografiese liggings (naby Ceres en in die Sandveld). Dit is ook ’n goeie gewas om met ander groente af te wissel, dus plant ek byvoorbeeld uie, dan wortels en dan beet. Só kan ek met minder grond meer hektare produseer.

Watter soort wortels kweek julle?

Ons plant verskillende kultivars op verskillende tye van die jaar.

Tans produseer ons slegs medium tot groot geelwortels, wat ons vars verkoop, maar ook verwerk en vir waardetoevoeging gebruik.

Vertel meer van die waardetoevoeging?

Ons verpak wortels (waarvan die lowwe verwyder is) in plastieksakkies. Ons sny dit ook op in ringe en juliennerepies vir verskillende verpakkings. En ons ontwikkel en versprei slaaie wat vakuumverpak of in sakkies beskikbaar is en ’n lang rakleeftyd het.

Hoe gereeld saai en oes julle?

Ons oes elke werksdag van die jaar, daarom het ons verskillende planttye. Ons saai sowat tien maande van die jaar, net nie in die middel van die winter nie. Die tydperk tussen saai en oes kan, na gelang van die tyd van die jaar, wissel van

Laastedrif Agri verbou heeljaar wortels, asook verskeie ander groente en vrugte.

80 dae tot 160 dae.

In watter klimaat gedy wortels?

Wortels soek hitte, maar nie te veel nie. Ek sou dit as ’n koelklimaat-gewas bestempel. Wortels verkies ook sanderige grond, sonder klip, om ’n mooi vorm te verseker.

Met watter probleme het jy te kampe?

Hael op die verkeerde tyd kan ’n probleem wees, asook wind. In die fase net ná saai en tydens ontkieming kan wind skade veroorsaak. Hitte kan ook probleme veroorsaak, veral as dit te warm is wanneer jy oes of plant.

Hoe lyk die mark vir wortels?

Soos met die meeste gewasse word die markgrootte deur die vraag en aanbod bepaal. Ek dink ons ervaar tans ’n ooraanbod.

Wat is jou gunstelingwortelgereg?

Ons hou van wortelslaai, en is veral lief daarvoor om wortels by bredies te voeg.