DARLING BREW
Wat maak Darling Brew anders as ander boetiekbrouers?
Darling Brew se storie het in 2010 begin en die besigheid het intussen uitstekend gegroei tot ’n internasionaal erkende handelsnaam. Ons is vandag baie trots op die wye verskeidenheid topgehalte-boetiekbiere en ander produkte wat deel vorm van ons aanbod. Ons unieke onderskeiding is die deurlopende gehalte van ons produkte. Hierdie stelling word gerugsteun deur die verskeie toekennings wat Darling Brew die afgelope drie jaar in die African Beer Cup- en die National Beer Trophykompetisie ingepalm het. Elkeen van ons boetiekbiere is geïnspireer deur ’n bedreigde spesie in die Suid-Afrikaanse ekostelsel. Ons is passievol oor bewaringswerk en daarom sluit ons hierdie aspek in soveel moontlik van ons produkaanbod in. Ons bemark ’n verantwoordelike en volhoubare leefstyl wat konsentreer op avontuur, familie en vriende. Verder is ons ’n trots Suid-Afrikaanse besigheid.
Vertel ons meer oor jul nie-alkoholiese reeks.
Just Naked, ons nie-alkoholiese lager, is in 2023 in die African Beer Cup as die beste nie-alkoholiese bier in Suid-Afrika aangewys. Ons het ons nie-alkoholiese aanbod verder uitgebrei met ons BOMB-reeks. Dié reeks staan bekend as sparked hopped coolers, aangesien die produk gegeur is met hop. Dit is beskikbaar in appel-, suurlemoen-, gemmer- en kersiegeur. Dis regte ontploffings van geur!
Die eerste bier wat julle gemaak het, was die ikoniese Slow Beer. Daar is ’n storie dat dit geïnspireer is deur ’n skilpad?
Slow Beer is ons vlagskipproduk wat deel vorm van Darling Brew se craft core- reeks, en is ’n ikoniese Suid-Afrikaanse lager. Ons aanvanklike inspirasie vir Slow Beer is afkomstig van een van die skaarsste skilpaaie ter wêreld, die geometriese skilpad oftewel suurpootjie. Sy treffende kleure, swart en geel, word in ons handelsmerk weerspieël. Geometriese skilpaaie is endemies in die Wes-Kaap met minder as 2 000 in die natuur oor, en word nou as ’n kritiek bedreigde spesie gelys.
Julle is SA se eerste koolstofneutrale brouery. Wat beteken dit?
Darling Brew het saamgespan met die volhoubaarheidskonsultant Ecolution Consulting wat verseker dat die besigheid se water- en energieverbruik merkwaardig afgeneem het, asook die brouery persentasie afval wat stortingsterrein toe gaan. Kort- en langtermynstrategieë is geïdentifiseer om te verseker dat Darling Brew voortdurend streef na volhoubare praktyke – ’n eerste onder bierbrouers in Afrika.
Waarna kan besoekers aan Nampo uitsien by jul toonbank, asook die VIP-area van die Plaaskombuis?
Ons is opgewonde om ons alkoholvrye BOMB-reeks aan Nampo-besoekers bekend te stel. Dié verfrissende drankies kan deur volwassenes én kinders geniet word. Ons Just Naked Lager gaan ook hier beskikbaar wees. Kom geniet dus ’n lekker koue bier sonder die effek van alkohol. VIP-gaste kan uitsien na ons volledige reeks boetiekbiere saam met hul ete. En as jy kan raai hoeveel pryse Darling Brew die afgelope drie jaar in die African Beer Cup en National Beer Trophy gewen het, sal ons aan een gelukkige wenner elke maand ’n kas boetiekbier vir ’n volle jaar verskaf!