RAGNHILD OLIVIER PAKHUISBESTUURDER
VINNIGE VRAE
Wat is sagtepit-granate en waarom is dit so gesog en gesond?
Daar is honderde, selfs duisende, verskillende soorte granate en elkeen het sy eie kleur, tekstuur en smaakprofiel. Die tradisionele soorte het ’n growwe skil en is soetsuur met ’n harde pit. Die nuwe soorte het meer vleis, dus is dit sappiger en makliker om te eet. Met die hoë antioksidant-inhoud is granate ’n superkos.
Waarom is Porterville so ’n geskikte area om granate te verbou?
Porterville is bekend om sy baie warm en droë somers, en die granaatplant hou daarvan. Granate het ook nie baie water nodig nie. Ons plaas, Houdconstant, se watergehalte is ook goed, wat help met boomgesondheid en vruggehalte.
Watter waardetoevoeging doen julle?
Ons konsentreer op die mark vir uitgedopte granaatpitte, wat in plastiekkoppies verpak en verkoop word. Ons oorweeg dit om vanjaar ook granaatsap te begin produseer.
Wat is jul vereistes wanneer julle granate aankoop en verwerk?
Die meeste van ons granate verbou ons self. Ons boer met ’n soort wat lekker soet is en ’n sagte pit het. Om die seisoen te verleng, sodat ons die heeljaar aan Freshmark kan lewer, koop ons granate aan van Wes-Kaapse boere tot so ver as Bonnievale.
Ragnhild Oliv Olivier er (links) n s is die pakhuisbestuurder by Pomegranate Fruit SA en Lizanne Janse van Rensburg is produksiebestuurder op die plaas Houdconstant by Porterville.
Die interne gehalte van die produk is vir ons die belangrikste. Dit is moeilik vir boere om klas 1-vrugte te produseer, want granate skaaf maklik of die kroontjies breek af. Solank die vrug mooi pitte het en ons dit lank kan opberg (drie tot vier maande), is dit reg vir ons. Ons bied dus vir boere ’n goeie alternatief as net die sapmark.
Groei die bedryf?
Die vars granaatpitbedryf is ’n baie klein deel van die bedryf.
Dit ding mee met ander gesonde vrugte, soos bessies. Ek glo meer mense verkies granate, selfs al is dit bietjie duurder weens die arbeidsintensiewe verwerkingsproses.
Hoe eet jy granate?
Ons gebruik dit oor slaaie of saam met nageregte, soos roomys. Of in ons gin & tonic as geurmiddel.