OLYFOLIE-SITRUSKOEK

Moenie afgeskrik word deur soetgebak wat met olyfolie gemaak word nie. Olyfolie gee ’n klam krummel, aangename geur en sagte tekstuur aan enige gebak, en koek en tert is geen uitsondering nie. Hierdie maklike meng-en-bak koek se inspirasie was ’n Griekse teekoek wat tradisioneel met sitrus en olyfolie gemaak word. Dit kry ’n ligte stropie oor en word nie versier nie, maar voorgesit met room, roomys, mascarpone of jogurt wat jy kan versoet as jy wil.

Beslag

310 ml koekmeel

■ 3 ml sout

■

160 ml witsuiker

■ 5 ml bakpoeier

■ 3 ml koeksoda

■ ■ 125 ml natuurlike jogurt

■ Fyngerasperde skil en sap van

■ 2 groot lemoene

2 ekstragroot eiers

■ 160 ml olyfolie

■ 10 ml vanieljegeursel

Stroop

■ Fyngerasperde skil en sap van 1 lemoen

■ Sap van 1 suurlemoen

■ 125 ml suiker

Voorverhit die oond tot 180 °C en smeer ’n ronde losboomkoekpan van 20 cm met olyfolie. Meng die droë bestanddele saam in ’n bak. Klits die jogurt, lemoenskil en -sap, eiers, olyfolie en vanielje in ’n ander bak en voeg dit by die droë bestanddele. Roer tot goed gemeng en glad en skep die beslag in die voorbereide pan. Bak die koek vir 30-35 minute tot goudbruin en deurgaar.

Maak die stroop terwyl die koek bak: Verhit die lemoenskil en die twee soorte sitrussap saam met die suiker tot die suiker gesmelt is. Laat die stroop net kookpunt bereik en verwyder van die hitte. Prik die koek met ’n toetspen sodra dit uit die oond kom en skep die stroop oor. Laat die koek in die pan afkoel vir minstens 30 minute voor jy die klamp losmaak en die koek uitkeer. Sit louwarm of teen kamertemperatuur voor. Lewer 12 porsies.