KORTPAD-KOOLFRIKKADELLE
Die oumense het hierdie lekker huiskos ouvrou-onder-die-kombers genoem. Dit is een van my gunsteling-winteretes wat ek uit my kindertyd kan onthou, vars gemaak met blaarkool uit my pa se groentetuin. As ek dit self maak en haastig is, gebruik ek varkworsies vir die frikkadelvulsel. Dit spaar baie tyd, die frikkadelle hou hul vorm mooi en die vleis is perfek gegeur. Gebruik wel die beste varkworsies wat jy kan kry – hoe beter die gehalte, hoe lekkerder die eindresultaat. Die tamatiesmoor kan gebottel of gevries word vir ander geregte, soos pasta. Vries die ongebakte frikkadelle in die sous. Plaas dit net so bevrore in die oond en bak vir 60 minute teen 180 °C.
Koolfrikkadelle
1 groot blaarkool
1 kg varkworsies van goeie gehalte 1 eier
10 ml fyngekapte vars tiemie
Tamatiesmoor
1 groot ui, fyngekap 3 selderystingels, gekap 50 ml olyfolie
500 g tamaties, geblansjeer,
■
skille afgetrek en gekap
125 ml asyn
125 ml witsuiker
2 ml kerriepoeier
2 ml mosterdpoeier
15 ml mielieblom (Maizena)
■
50 ml water
■
Sout en peper na smaak
■
Sny die kool se stronk af en verwyder die buiteblare baie versigtig, een vir een. (Jy gaan ongeveer 12 groot koolblare nodig hê.) Verhit ’n groot kastrol met water en ’n bietjie sout tot kookpunt en kook die koolblare daarin tot sag. Dreineer en hou eenkant.
Tamatiesmoor: Braai die ui en seldery in die olyfolie tot glansend. Voeg die tamaties, asyn, suiker, kerriepoeier en mosterdpoeier by en kook vir 15 minute tot die tamaties sag is. Meng die mielieblom met die water en voeg dit by die mengsel. Kook vir 5 minute tot verdik. Geur na smaak met sout en peper en hou eenkant.
Voorverhit die oond tot 180 °C en smeer ’n oondvaste skottel met olie. Sny die varkworsies oop en druk die vleismengsel uit die worsderms. Voeg die eier en kruie by die worsvleis en meng goed deur. Vorm 12 ewe groot frikkadelle. Vou elke frikkadel in ’n koolblaar toe en pak die koolfrikkadelle, met die gladde kante na bo, in die oondbak. Skep die tamatiesmoor oor, bedek en bak vir 30 minute. Haal die deksel af en bak onbedek vir nog 15 minute. Sit warm voor. Lewer 6-8 porsies.