SMARTIEKOEKIES
Smarties maak doodgewone soetkoekies ekstra-lekker. Ek het ’n blomvormige koekiedrukker gebruik om die deeg uit te druk en die koekies ’n blomtema gee deur dit verder te versier met helderkleurige koninklike versiersel en roomysstokkies (ook met koninklike versiersel) aan die agterkante vasgeplak. Jy kan vrye teuels aan jou verbeelding gee en jou eie Smartiekoekies ontwerp. Klein kinders is dol hieroor, maar selfs die koelste hoërskoolkind sal hiervan hou.
Koekies
225 g botter of margarien 250 ml strooisuiker
2 eiers
5 ml vanieljegeursel
■
4 x 250 ml koekmeel
■
5 ml bakpoeier
■
3 ml koeksoda
■
60 ml melk
■
1 groot pak (150 g) Smarties
■
Koninklike versiersel
2 ekstragroot eierwitte
5 ml suurlemoensap
660 ml versiersuiker, gesif Kleursel en geursel van jou keuse
Koekies: Verroom die botter en suiker saam tot lig. Voeg die eiers en vanieljegeursel by en klits goed. Voeg die meel en bakpoeier by en roer ’n paar keer. Los die koeksoda in die melk op en voeg by. Meng tot ’n sagte deeg. Draai die deeg toe in kleefplastiek en verkoel vir minstens 30 minute.
Voorverhit die oond tot 200 °C en smeer ’n paar bakplate. Rol die deeg 3 mm dik uit op ’n meelbestrooide oppervlak en druk groot sirkels uit. Pak op ’n bakplaat en druk ’n paar Smarties in elke deegsirkel (soos op die foto). Bak vir sowat 10 minute tot liggoudbruin. Laat op die plate afkoel tot ferm en pak dan op ’n draadrak om heeltemal af te koel.
Versiersel: Meng die eierwitte en suurlemoensap en klits dit liggies. Voeg die gesifte versiersuiker lepel vir lepel by en klits met ’n draadklitser tot glad, blink en dik. Kleur en geur na smaak en skep in ’n versiersak. Knip ’n klein puntjie af en versier die koekies daarmee. Pak op ’n draadrak en laat staan tot die versiersel hard is voor jy die koekies lugdig verpak.