EKONOMIESE HOENDERKERRIE VIR 50

Dié kerrie bevat geen groente nie. Jy kan dit ver rek deur blokkies aartappel (of patat) en gemengde groente by te voeg. Jy sal dan net ’n bietjie meer water moet byvoeg vir die groente om in gaar te word.

250 ml olie, vir braai

9 kg hoenderstukke met vel en been Hoenderspeserye na smaak

8 uie, geskil en grofgekap 12 knoffelhuisies, fyngekap

160 ml matige kerriepoeier

80 ml borrie

15 ml fyn kaneel

10 ml fyn koljander

■

10 ml fyn komyn

■

100 ml suurlemoensap

■

375 ml blatjang

45 ml sout

10 ml swartpeper

100 ml appelkooskonfyt

Water Verhit ’n bietjie olie op ’n slag in ’n groot swaarboompot. Geur elke porsie hoender liggies met hoenderspeserye en braai die hoender in lotte in die olie bruin. Skep elke lot uit en laat die volgende bietjie olie weer goed warm word voor jy die volgende lot hoender braai. As al die hoender klaar bruin gebraai is, braai die uie, knoffel en kerriepoeier stadig saam in dieselfde pot tot die uie sag is. Voeg die borrie, kaneel, koljander en komyn by en braai vir sowat 5 minute saam met die uie. Skep al die hoender terug in die pot. Meng die suurlemoensap, blatjang, sout, peper en konfyt in ’n aparte bak en voeg dit by die hoender.

Voeg ’n bietjie water by, roer deur en verhit tot kookpunt. Verlaag die hitte, sit die kastrol se deksel op en laat prut vir 45 minute tot die hoender sag is. Kyk gereeld dat daar genoeg vloeistof in die pot is, en vul met water aan indien nodig. As daar aan die einde van die kooktyd te veel vloeistof in die pot is, verhoog die hitte en kook om van die vloeistof af te kook.