MISKRUIERS IS PARASIETE SE MOSES

Miskruiers breek nie net miskoeke in die veld af nie, hulle help ook om die aantal parasiete in miskoeke te verminder, het Britse navorsers bevind.

Die navorsers van die Universiteit van Bristol het koeke gevorm met mis wat elders bymekaargemaak is. Dié is met miskruiers en verskillende gesimuleerde reënvalsituasies gekombineer.

Aanvanklik het hulle bevind daar is meer parasiete om die miskoeke wat deur miskruiers gekoloniseer is as om dié wat nie deur die miskruiers ingeneem is nie.

Ná agt weke was daar egter minder parasietlarwes, en só het dit vir die res van die 10 week-eksperiment gebly.

Hulle het toe ’n situasie met verhoogde reënval gesimuleer deur die miskoeke van tyd tot tyd nat te maak.

Dít het meer parasietlarwes op die weiding veroorsaak, ’n aanduiding dat swaar reënval die goeie werk wat miskruiers doen om veeparasiete te verminder, kan neutraliseer.

Een teorie is dat miskruieraktiwiteit miskoeke deurlug, wat aanvanklik gunstige toestande vir die uitbroei van parasieteiers verseker.

In hierdie eksperiment het minder parasiete egter in miskoeke met meer miskruiers oorleef. Die navorsers se verduideliking is dat larwes vogtige toestande benodig. Miskruieraktiwiteit droog miskoeke egter vinnig uit, wat die parasiete laat vrek.

Gemiddeld 200 insekte het elke miskoek beset, waaronder 20 Aphodius- miskruiers wat permanent in die mis woon.

Me. Bryony Sands, die projekleier, sê hul resultate wys miskruierbewaring is noodsaaklik vir die welstand van plaasdiere. Die probleem is dat die onafgebreekte chemiese bestanddele van parasietbestrydingsmiddels dikwels in die diere se miskoeke beland en giftig vir die miskruiers kan wees.