KRUISTELING SE VOORDELE

Mnr. Christiaan de Jager het proewe met kruisteling vir swaarder speenkalwers gedoen deur Chianina-bulle met Afrikaner-, Brahman-, Angus-, Pinzgauer-, Simmentaler-, Simbra-, Braunvieh-, Nguni-, Boran- en Jerseykoeie te kruis.

Die kruisings lewer almal ’n speenkalf met ’n gladde haarkleed en goeie bespiering, groei, pigmentasie, temperament en skede. Die kalf bereik vinnig ’n bemarkbare gewig.

Christiaan het ’n Chianina-Simmentaler-en ‘n Chianina-Simbrabul by die Landbounavorsingsraad (LNR) se Instituut vir Diereverbetering by Irene aan ’n fase C-toets laat deelneem.

Die Chianina-Simmentalerkruising se gemiddelde daaglikse gewigstoename (GDT) van 2,436 kg per dag en voerom-settingsverhouding (VOV) van 3,88 was die beste.

Die Chianina-Simbra-kruising se voerinname oor 84 dae (742 kg) was feitlik dieselfde as dié van die Brahmane (741 kg) in die toets. Sy daaglikse voerinname van 9,48 kg was slegs 2,25% van sy liggaamsgewig, maar hy het nogtans ’n hoë GDT en lae VOV gehandhaaf.

Die Simbra-kruisbul se GDT was 2,055 kg per dag, die VOV was 4,29, sy totale voerinname was 742 kg en sy daaglikse voerinname was 8,84 kg.

Volgens Christiaan se berekenings verbeter die Chianina die Simmentaler se GDT met 19,8% en VOV met 32%. Dié kruising sit 26% meer gewig aan, grootliks danksy kruiskrag waar die rasse totaal onverwant is aan mekaar.

Christiaan bereken die ChianinaSimmentaler-kruising kan ’n wins van R4 975,32 maak. Dit is bereken op grond van: 1 043 kg voer teen 9,48 kg/dag vir 110 dae ter waarde van R3 129 (R3 000/ton). ’n Gewigstoename van 268 kg teen gemiddeld 2,436 kg/dag. ’n Uitslagpersentasie van 63. ’n Karkasprys aan die haak van R48/kg.