Onthouoomblikke in die wynbedryf
In 1954 laat Landbouweekblad die kollig op twee raakvatboervroue val.
Laeveldse hitte kan haar ywer nie keer
Om in die Laeveld van OosTransvaal vrugte in te maak en konfyt te kook, is geen plesier nie. Die hitte van die dag is op sigself erg genoeg, sonder dié van ’n warm stoof. Selfs snags is dit byna onuithoudbaar. Mev. I. van Niekerk van Kaapmuiden het ten spyte daarvan binne ’n week, sonder enige hulp,
180 groot bottels met ingemaakte vrugte, vrugtejellie en konfyt gevul. En sy moes net snags werk, want gedurende die dag beklee sy ’n betrekking elders. Die bottels is onder meer vol mango’s, appels, pere, appelkose, perskes, pruime, lemoene, waatlemoenkonfyt, pynappel en piesangs.
Rossmore se raakvatter
’n Weduwee van Johannesburg het skoonskip gemaak op die Randse Paastentoonstelling se huisvlytafdeling.
Mev. T. Roux van Rossmore het vir alles ingeskryf “waarvoor die boek voorsiening maak”.
Net om die pryse te sien wat haar ingemaakte vrugte en groente, konfyte, blatjang en souse gewen het, is al te goed om te glo.
Maar hoe verder jy in die saal afstap, hoe groter wil jou mond oopval. Dis dieselfde storie van voor af by die gebak, ingemaakte wors, hoender, tong en soutvleis. Draai jy ’n bietjie weg vir afwisseling na ’n heeltemal afsonderlike deel in die saal, dan is dit maar weer sulke tyd. Ook hier het mev. Roux weggeloop met die pryse vir biltong, vloerwaks, meubelwaks en wie weet alles.
Sy het 79 pryse verower, waarvan 50 eerste pryse was. Boonop het haar stoof ingegee voordat sy met al haar inskrywings klaar was.
Sy skryf dit hieraan toe dat sy vir haar suikerbord net 95 persent gekry het.