Die Oranjerivierskema was een van die grootste ingenieursprojekte in Suid-Afrika
se geskiedenis. By die publiek het daar een groot kwelvraag gehang:
Gaan hierdie megaprojek daarin slaag om Suid-Afrika se moederrivier te tem?
1970 Die Hendrik Verwoerddam (vandag die Gariepdam) naby Norvalspont nader voltooiing. Die water van die Oranjerivier, Suid-Afrika se grootste rivier, het eeue vooraf grootliks onbenut see toe gevoer. Nou word die rivier stapsgewys getem en sy water hokgeslaan. Bouwerk het tentatief begin, met klein kofferdamme wat die rivier se vloei moes verskuif sodat bouers die fondasie in die moederrots kon sink. In die volgende somer sal die Oranje se water hier – agter dié reuse-betonkonstruksie – opgedam kan word. Die massiewe wal gaan 88 m hoog wees.
1972 Staatspresident J.J. Fouché het die dam geopen. Mnr. Fanie Botha, minister van waterwese, het die 1 200 eregaste met die hand gegroet, onder meer mev. Betsie Verwoerd.
1975 Die Oranje-Vistonnel in aanbou. Dit is 82,8 km lank en voer water vanaf die Oviston-inlaattoring in die Hendrik Verwoerddam onder die Suurbergplato in die Winterbergreeks tot by die Teebuisspruit.