Pa en seun in die veld
Die destydse VETSAK (die Vrystaatse en Transvaalse Sentrale Aankoopkoöperasie wat later Agrinet geword het) het in 1976 ’n groot korporatiewe dag gehou met die oog daarop om die verkope van Fiat-trekkers te bevorder. Dit was egter nie net werk, werk, werk nie, want die middag het ’n sportbyeenkoms ingesluit. Daar het mnr. Piet de Jager, toe hoofbestuurder van
VETSAK, sommer kaalvoet die rolbalbaan aangedurf. By hom is, van links, mnre. P. Hugo (hoofbestuurder van Kroonstad-Westelike Koöperasie op Kroonstad), John Schoonwinkel (bestuurder van Kroonstad-Westelike Koöperasie op Bethlehem) en A.D. Ras (bestuurder van Noordwestelike Koöperasie op Lichtenburg). Die biljarttafels, tennisbane en veral veerpyltjieborde het ook groot byval gevind – onder luide aanmoediging van die toeskouers. ’n Mens kan net aflei dat daar nie ’n tekort aan kwinkslae was nie, want daar word selfs melding gemaak van die veerpyltjiegooier mnr. Niek Viljoen (van die Noordwestelike Koöperasie op Delareyville) “wat met die mond volpunte verdien het”.