As ’n kind toevallig naby is op die plaas waar ’n joernalis van Landbouweekblad is, moet hulle nader staan om skaal te gee aan die tamaai bees of rekordoes op
die voorblad. Dié kinders boer mos reeds.
28 September 1965 Albertyn Nel ry sy oupa se grootkampioenbul, Toekoms Shamrock. Die bul, wat die skaal op 2 250 pond trek, behoort aan mnr. P.D. Albertyn van Onverwag, Ottosdal, wat saam met sy seun, Marinus, bruin Switserbeeste teel en uitvoer.
21 Julie 1970 Martie Wessels by die SA reserwekampioen-Merinoram (lang- en fynwol). Dié ram kom van die broers Mattheus en Human Wessels, van Middelspruit, Kroonstad. Die Mieliedriehoek se Merino’s staan nie vir Merino’s in die Karoo en Suid-Vrystaat terug nie.
24 Februarie 1970 Dié Nieu-Seelandse wit konyn is só stewig in die vleis dat Heinrich Loots hom beswaarlik kan vashou. Ná ’n beskeie begin met twaalf konyne, het Heinrich se pa, mnr. J.H. Loots van Bella Vista, Muldersdrif, nou 8 000 langore in sy hokke.
5 September 1967 Dawn Mentz sit tussen duisende Swazilandse pomelo’s. Die stukrag agter Swaziland se vrugtebedryf is sy vrugte-inmaakfabriek by Malkerns. Hierdie fabriek verwerk onder meer 3 000 ton pomelo’s per jaar.
20 Des 1960 Pieter du Toit het sy lewe aan bokmelk te danke – geen babakos of ander melk wou met hom akkordeer nie. Sy pa is mnr.
D.J. du Toit van Ebeneser, Marydale, ondervoorsitter van die SA Melkboktelersvereniging.
10 Julie 1956 Jannie du Plessis van Kuilsrivier met ’n hoed vol kuikens. Sy pa, mnr. Charl du Plessis, het oorgeslaan tot die hoenderbattery-stelsel om sowat 70 000 kuikens per jaar op sy plaas Duplenia uit te broei.