MOTORS, VERVOLGVERHALE EN REGSADVIES
Oor die afgelope eeu het verskeie gerekende en gewilde medewerkers oor ’n wye verskeidenheid onderwerpe in Landbouweekblad geskryf.
M.C. van Sandwyk het van 1923 tot 1950 ’n weeklikse motorrubriek behartig. Dit was pionierswerk in die era toe motorvoertuie oorgeneem het by ry- en werktuie wat met trekdiere bespan is. Van Sandwyk het in 1935 ook die eerste lys Afrikaanse motorterme saamgestel.
G.R. von Wielligh, ’n vroeë Afrikaanse skrywer en taalstryder, het verskeie bydraes in die 1920’s aan Landbouweekblad gestuur. Tydens die redakteurskap van Sarel van Vuuren het adv. C.R. (Blackie) Swart die regsvrae van lesers in die rubriek “Die Wet in die Alledaagse Lewe” beantwoord. Met republiekwording in 1961 het Swart die land se eerste staatspresident geword (destyds ’n seremoniële amp, met die uitvoerende magte in
die hande van ’n eerste minister).
Vervolgverhale was jare lank gewilde leesstof in Landbouweekblad. Die laaste een het in November 2013 ten einde geloop. Bekende Afrikaanse skrywers van ontspanningsverhale, onder andere Doc Immelman, se werk het in die tydskrif verskyn.
Vervolgverhale van ten minste drie wenners van die hoogaangeskrewe Hertzogprys vir letterkunde – C.M. van den Heever (wenner in 1928 en 1942), C.H. Kühn (1936) en
F.A. Venter (1961) – is geplaas.
Van den Heever se vroeë roman Langs die Grootpad is as vervolgverhaal aangebied.
Hy was in 1924-’25 kortstondig ’n redaksielid van Landbouweekblad en later hoogleraar in Afrikaans-Nederlands aan die Universiteit van die Witwatersrand.
Kühn het onder die naam Mikro geskryf. Sy vervolgverhaal “Die ruiter in die nag” het in 1935 verskyn.
Ontspanningsverhale van Venter is onder die skrywersname Meiring Fouché, Elske te Water, René Stegmann en Marius de Jongh gebruik.