DIE EERSTE REËN OP LEMOENBOORDE
Mnr. Dirk Visser van die plaas Heksrivier, tussen Citrusdal en Clanwilliam, is een van die vroeë pioniers van sprinkelbesproeiing in Suid-Afrika. Hy het al in 1939 daarmee begin en is na beste wete die eerste man wat besproeiingswater op lemoenboorde laat “reën” het.
Heksrivier se kunsmatige reën is afkomstig uit ’n voortjie wat oor die plaas loop. Die rivierwater word uitgekeer in 3 myl se ondergrondse sementpype wat deur die boorde loop. Uitgemesselde suiggate is plek-plek aan dié pype verbind. ’n Mobiele spuiteenheid word daaraan gekoppel. Dit bestaan uit ’n dieselenjin, kragtige pomp en verstelbare spuit wat die water deur ’n gaatjie van 42 mm uitlaat. Die spuit word só gestel dat dit heen en weer deur twee derdes van ’n sirkel loop en al agter die rug van die spuiteenheid laat reën (nie voor dit nie, want dan kan die spuiteenheid in die nat grond vasval).
Die pomp spuit water 80 tree ver in alle rigtings, en is so netjies ontwerp dat dit oor die hele afstand ewe veel laat reën. Die spuit staan tipies ’n uur by ’n suiggat en laat in dié tyd een duim reën op 250 bome val – altesame sowat 50 000 gelling water.