AFGRI eer eeu van inligting aan boere
Landbouweekblad vier vanjaar sy 100ste bestaansjaar. AFGRI en dié tydskrif het baie gemeen: Albei is op ’n sterk erfenis gebou met onuitwisbare vennootskappe,
samewerking, kennis en vertroue.
AFGRI bied sy opregte gelukwense aan ’n publikasie wat, soos AFGRI, oor etlike jare sy waarde bewys en in die afgelope eeu ’n belangrike deel van die landboureis in Suid-Afrika meegemaak het.
Hoewel AFGRI altyd die goeie herinneringe sal koester van die opgerolde Landbouweekblad- uitgawes wat so lekker uit posbusse gehaal kon word, vars van die drukpers af, vier hy ook die evolusie van die publikasie in ’n moderne, elektroniese formaat – maklik toeganklik op enige toestel en geskik vir vandag se vinnige wêreld.
AFGRI vier ook Landbouweekblad se diversifikasie op ander mediaplatforms, waaronder televisie, om só te verseker dat meer Suid-Afrikaners toegang kry tot dié instelling se merkwaardige kennis. AFGRI bring verder lof aan Landbouweekblad se rotsvaste ondersteuning aan ’n bedryf waaroor AFGRI net so geesdriftig is.
ONDERSTEUNING
AFGRI is trots daarop om sedert 2018 die hoofborg te wees van die immergewilde TV-program Landbouweekliks. Dié program word weekliks op VIA, DStv-kanaal 147, uitgesaai en is reeds in sy vyfde seisoen. Dit is hierdie soort vennootskap met Landbouweekblad waarop AFGRI wil voortbou. Dit lewer nie net ’n gunstige bydrae aan die boer nie, maar ook aan die wyer landbougemeenskap. Die breër Suid-Afrikaanse bevolking kry ook die geleentheid om die bedryf en sy belanghebbendes beter te verstaan en te waardeer.
GETUIGSKRIF
AFGRI het nie net ’n jare lange vennootskap met Landbouweekblad nie, maar ook met sy eie kliënte. AFGRI vertel graag aan Landbouweekblad se lesers wat AFGRI se kliënte van dié maatskappy waardeer – ongetwyfeld soortgelyk aan die reaksies van Landbouweekblad- lesers oor hul gunstelingtydskrif! “Met die oog op ons langtermyngroeiplanne het ons besluit om ons finansieringsopsies deeglik te heroorweeg. Ons het aanbiedinge by verskeie finansiers verkry. Baie faktore was vir ons belangrik en moes by ons keuse inpas. UNIGRO het aan ál die vereistes voldoen, daarom het ons ons finansiering na hom verskuif. Wat ons egter werklik beïndruk het, is die mense van UNIGRO wat ons aansoek behartig het. Harry Conradie en Ben Lombard se kundigheid, ervaring en professionaliteit is verpak in hul nederigheid, respek en vriendelikheid. Die aansoekproses en inwerkingstelling van die UNIGRO-geriewe het ons lewens verryk.” – mnr. Hennie van Romburgh van Vaalharts, Noord-Kaap.
“Niks kan met AFGRI se diens vergelyk word nie. Sipho Lowane is my verhoudingsbestuurder in Noordwes en het my aan AFGRI bekend gestel. Ek is baie tevrede met die ondersteuning wat ek van hom af kry.” – mnr. Ramoso Pholo van Mooifontein, Lichtenburg, Noordwes.
“Ek was so beïndruk toe AFGRI my gehelp het om ’n trekker te koop om my meganisasievermoë te verbeter. Hy verstaan werklik ons situasie as nuwe-eraboere. Dit is my derde jaar by AFGRI en ek is baie tevrede met die diens wat ek ontvang.” – mnr. Ruben Motlhabane van Wesselsbron, Vrystaat.
“AFGRI is altyd beskikbaar wanneer ek hom nodig het. Ons het dieselfde visie, en terwyl my korttermyndoelwit is om 1 000 ha te beplant, weet ek hoe meer ek groei, hoe meer sal ek AFGRI aan my sy nodig hê.” – mnr. Solomon Masango van Carolina, Mpumalanga.
GOEIE VERHOUDINGS
AFGRI is trots op hierdie getuigskrifte omdat die maatskappy se kultuur en waardes daarop geskoei is om te verseker sy kliënte word goed versorg. AFGRI verkies om hulle vennote te noem – dit is die aard van sy samewerking met individue en besighede – en om seker te maak die maatskappy se landboukennis, produkte en dienste bevoordeel werklik sy kliënte.
Deur vennootskappe ontwikkel AFGRI wedersydse vertroue. Dit bewys hy sal sy kliënte deur dik en dun bystaan, al word die bedryf deur verskeie veranderlikes gekenmerk.
AFGRI en Landbouweekblad staan al meer as nege dekades sy aan sy – ’n bewys dat enige goeie vennootskap mettertyd gesmee en versterk word deur inligting uit te ruil en deur vriendskap.
“Vir AFGRI is die verhoudings wat ons met ons landbouvennote bou en handhaaf uiters belangrik.
“Ons sien uit om in die toekoms verder saam met Landbouweekblad en ons kliënte te werk om selfs ’n sterker landboubedryf in Suid-Afrika te help vestig,” sê mnr. Tinus Prinsloo, uitvoerende hoof van AFGRI.
UNIGRO Finansiële Dienste is ’n filiaal van AFGRI.