ONS OGIES

Ogies, ’n klein mopshondjie van Bellville, is in die 1970’s bestempel as “die mees gefotografeerde hond in die land”. Sy het aan Fred Jooste, hooffotograaf van Die Burger, behoort, en Landbouweekblad- lesers vir jare met haar kaskenades vermaak. Sy was ook twéé keer op die voorblad.

In Ogies se weeklikse rubriek baklei sy met Koensie die bloubloed-Siamees, raak verloof aan Oubaas, ’n mopshondjie van Franschhoek (“posmense kan gerus ’n spesiale seël uitgee om die gebeurtenis te herdenk, soos vir prinses Anne en haar Mark”), en lewer breedvoerig kommentaar oor Cravenweek en ander rugbynuus.

Sy het diep in lesers se harte ingekruip – die Navorsingsinstituut vir Vee- en Suiwelkunde in Bloemfontein het tot ’n spesiale winterjassie vir haar gemaak.

Ogies – “Landbouweekblad se hond” – is in 1982 op die ouderdom van 12 oorlede.