Vertroue in familie laat maatskappy groei
’n Sakebesluit van drie dekades gelede
het gelei tot die stigting van een van Suider-Afrika se belangrikste gewasbeskermingsmaatskappye. Die maatskappy is trots op Landbouweekblad se eeufees en vier dit graag saam met die tydskrif.
L aeveld Agrochem vier vanjaar sy 28ste bestaansjaar.
“Ons hoop om, net soos Landbouweekblad, ook uiteindelik 100 jaar te kan vier. Dit is vir ons lekker om ’n vennoot van Landbouweekblad te wees, want ons het dieselfde waardes. Ons en Landbouweekblad gaan uit ons pad om boere op te hef. Ons is probleemoplossers in die bedryf,” sê mnr. Corné Liebenberg, bemarkingsbestuurder van Laeveld Agrochem.
WAAGMOED
Mnr. Nick Liebenberg, uitvoerende hoof van Laeveld Agrochem, sê dit het ’n goeie plan en baie geloof gekos om byna drie dekades gelede sy standvastige werk te verruil vir ’n onsekere toekoms as entrepreneur.
“In daardie stadium was ek die bemarkingsbestuurder by Bayer. Destyds het multinasionale ondernemings besluit om agente en handelaarskappe te gebruik vir verspreiding. Ek, my seun Corné en ’n paar vriende het toe die kans waargeneem om self een van hierdie handelaarskappe te begin.”
Laeveld Agrochem het intussen ook ’n franchisemodel binne die maatskappy ontwikkel sodat al sy takke individuele eienaars het.
“Ons het oor die jare heen goeie verhoudings met ’n netwerk mense in die bedryf opgebou. Daardie jare het ons met ’n handdruk sake gedoen. Vandag is integriteit steeds die ruggraat van ons onderneming se sukses,” sê Nick.
Laeveld Agrochem het ’n reuseprodukaanbod en ondersteun graag maatskappye wat self produkte ontwikkel.
Sy gewasbeskermingsreeks sluit produkte van verskillende maatskappye in. Dit behels onkruid, insek, swam en plaagdoders. ’n Reeks biologiese produkte en dieregesondheidsprodukte is ook beskikbaar.
Laeveld Agrochem is lid van CropLife SuidAfrika en onderskryf die gedragskode van die vereniging.
VOORDELE
Waardetoevoeging en die ontsluiting van geleenthede is een van Laeveld Agrochem se sterk punte. Vandag doen die maatskappy sake oral in SuidAfrika, asook in Namibië, Botswana en Zambië.
“Ons is meer as net ’n gifsmous, ons bevorder voedselsekerheid deur ’n gesondheidsdiens aan die landbou te lewer om só oeste te optimaliseer,” sê Corné.
“Dié optimalisering behels meer as net produkverkope en sluit adviesdienste en praktiese hulp en dienste aan die boer in. Dit omvat die uitwerk van protokolle vir uitvoer sodat geen ongewenste chemiese residu op produkte agterbly nie.”
Die naastenby 135 agente en 70 verspreidingsdepots van Laeveld Agrochem het ten doel om in elke plaas se spesifieke behoefte te voorsien. Om die regte produkte of spesialiteitsmengsels te lewer, werk die agent saam met die boer.
“Vertroue bou jy met verloop van tyd op. Die meeste van ons agente is ouer as 50, wat dui op die kennis en vertroue wat oor dekades heen tussen ons en kliënte gevestig is,” sê Corné.
Corné meen dit is nodig om binne die boerderygemeenskappe waar hulle sake doen, ’n verskil te maak aan meer as net boere se oeste.
Laeveld Agrochem is daarom betrokke by verskeie boeredae en landbouskoue, maar ook by musiekkonserte en rolprentprojekte wat die Afrikaanse kultuur bevorder.
As jy van flieks, soos Pad na jou hart en Vir altyd, gehou het – Laeveld Agrochem was deel van die
span wat dit moontlik gemaak het.
FAMILIEWAARDES
Laeveld Agrochem speel ’n groot rol in die landbou in SuiderAfrika. Tog bly die maatskappy in wese ’n familieonderneming.
Nick meen die maatskappy waak teen ’n té streng korporatiewe atmosfeer. Só word die hegte band tussen familie en vriende na die onderneming oorgedra, en dit sorg vir wedersydse vertroue en respek. Deesdae is daar genoeg plek vir drie geslagte om by die maatskappy te werk.
“Die ondersteuning van jou gesin, familie en vriende is belangrik in ’n familieonderneming. Ons kan mekaar vertrou en op mekaar steun – of dit nou by die kantoor of by die huis is.
“Hierdie waardes leef ons elke dag in ons maatskappy uit. Sodra jy met ons sake doen, stap ons ’n pad saam met jou en word jy deel van ons familie se omgeekring,” sê Nick.