John Deere se verhaal
Deere & Company het ’n klein begin in Suid-Afrika gehad. Vandag is John Deere toegespits op die meganisasie van Afrika.
Skipbreuk aan die kus by Bathurst was die begin van 137 jaar van John Deere-toerusting in Suid-Afrika. Twee John Deere Prairie Queen-loopploeë wat in 1878 uit die wrak herwin is, is deur mnr. George Knott van Botha’s Post, Victoria-Oos, op ’n veiling aangekoop.
John Deere het in die 1920’s ’n blywender teenwoordigheid in Suid-Afrika gevestig deur die Johannesburgse invoerder Dunell, Ebden & Company. Dit is merkwaardig omdat John Deere in sy eerste 100 jaar feitlik net in Amerika bedrywig was.
In 1930 het John Deere ’n 50%belang in Dunell, Ebden & Company bekom, en in 1939 was P. Andrag & Sons van Kaapstad die volgende handelaar wat sake met John Deere gedoen het.
In 1962 het John Deere ’n 75%belang gekoop in South African Cultivators (Edms.) Bpk. van Nigel, wat in 1949 gestig is. Die stigter mnr. Nils Gregerson is as uitvoerende hoof behou, maar die naam van die onderneming is na John Deere-Bobaas (Edms.) Bpk. verander.
In die vroeë 1970’s is die vervaardigingsvermoë by die Nigel-aanleg uitgebrei om in die toenemende vraag na bewerkingstoerusting te voorsien. Suid-Afrikaanse klante het die meeste daarvan gekoop, maar daar is ook na Namibië, Zambië, Zimbabwe, Mosambiek en die Midde-Ooste uitgevoer.
Om die suksesvolle 1240- en
1290-planter te vervang, het John Deere in 1976 die 7000-planters bekend gestel as ’n ten volle Suid-Afrikaanse vervaardigde reeks, aangevul deur die 26Bintegrale planter wat toe reeds by die Nigel-aanleg vervaardig is.
Mnr. Wayne Chesney was die besturende direkteur tot in 1979, met mnr. Leighton Lee die vervaardigingsbestuurder van 1972 tot 1988.
John Deere het ’ n bydrae gelewer tot die opleiding van kinders in veral Duduza, waar die meeste van sy werknemers gewoon het. Die John Deerestigting het in die laat 1980’s meer as $400 000 (R5,7 miljoen) bygedra vir die bou van ’n algemene en tegniese hoërskool.
1980’S TOT NOU
In die 1980’s is verskeie nuwe grondbewerkingsprodukte ontwikkel. Die Nigel-vervaardigingsbedrywighede is in Februarie 1982 met ’n nuwe trekkeraanleg uitgebrei. Trekkers wat daar vervaardig is, is ontwerp om die Suid-Afrikaanse ADE-vervaardigde Perkins-enjin te inkorporeer – in vier- en sessilindermodelle.
’n Mylpaal in 1988 was die bekendstelling van die Nigelvervaardigde reeks N7200-planters met die nuwe vakuumsaadmetingstelsel, sterk planteenhede, ry-eenheidkoppelstukke en groot enkelskyf-kunsmisoopmakers.
John Deere Suid-Afrika het deur die 1980’s bestendig gegroei onder leiding van mnre. Bill Hubbard, besturende direkteur, Bert Pepler, verkoops- en bemarkingsbestuurder, en Lee, fabrieksbestuurder.
In die 1990’s het die Nigelvervaardigingsaanleg in nuwe bewerkings- en planttoerusting belê om in die groeiende vraag na Nigel-, Mannheimen Waterloo-trekkers te voorsien. ’n Nuwe reeks 100- en 120-ploeë, N960-landebewerker en Nigel-vervaardigde 825-rygewasbewerkers is in die vroeë 1990’s bekend gestel. Die reeks 1750-planters het die N7200 in 1998 vervang en die suksesvolste planter in Suid-Afrika geword.
Die regering het in 1995 die beskermende invoerreg laat vaar, wat plaaslike trekkervervaardiging basies tot ’n einde gebring en tot die uitfasering van die gewilde 51-reeks gelei het. Die nuwe 6000-reeks Mannheim-trekkers het die 51-reeks vervang en die topverkoper in Suid-Afrika geword.
In dié tyd is die Waterloo 7000-, 8000- en 9000-reeks bekend gestel, wat die 40- en 50reeks trekkers vervang het.
John Deere Suid-Afrika se werksaamhede het deur die 1990’s suksesvol voortgegaan onder leiding van Pepler.
Ná 43 jaar het John Deere sy Nigel-vervaardigingsaanleg in Junie 2005 gesluit. ’n Nuwe takkantoor en opleidingsentrum in Boksburg is in Junie 2006 voltooi en in gebruik geneem.
Teen 2006 het die maatskappy se markaandeel tot 30% toegeneem. Mnr. Mel McGlinchey van Ierland is in hierdie tyd besturende direkteur.
In 2009 het Deere & Company se leierskap die werksaamhede van John Deere Suid-Afrika herstruktureer om sakeverantwoordelikheid vir die hele Afrika suid van die Sahara (SSA) in te sluit. Sedertdien staan John Deere SSA se werksaamhede onder leiding van mnr. Len Brand en aanvaar hy verkoops- en bemarkingsverantwoordelikheid vir 48 lande suid van die Sahara.
Sedert 2011 is John Deere SSA die leier op die trekkermark in Suid-Afrika en sedert 2012 ook op die oesmasjienmark. John Deere SSA lei ook spuitverkope in Suid-Afrika sedert 2004.
In Desember 2012 is ’n Johannesburgse RDC-onderdele-aanleg van 5 000 m2 naby die OR Tambo-lughawe geopen. In 2014 het John Deere SSA takkantore in Nairobi, Kenia, en Accra, Ghana, geopen.
In 2015 het mnr. Jason Brantley die leisels oorgeneem, met gemiddeld 130 mense in diens. Die tak konsentreer nou ook op meganisasie in Afrika met behulp van kleiner landbouwerktuie.
In 2018 het mnr. Jacques Taylor besturende direkteur geword.
John Deere bly daartoe verbind om die voorste verskaffer van landboutoerusting in Afrika te wees.