VIR JUKSKEI REIS ONS BAIE VER
In 1952 het jukskeispelers van Lüderitz ’n duisend myl afgelê om aan ’n jukskeikompetisie deel te neem. Hulle moes die reis, wat ongeveer vyf dae per trein heen en weer geduur het, onderneem wanneer Keetmanshoop, hul wyksbond, teen Windhoek se wyksbond kragte gemeet het. Namibië (toe nog bekend as Suidwes) was in vier wyksbonde verdeel, naamlik Keetmanshoop, Windhoek, Usakos-Omaruru en Otjiwarongo-Outjo. Die wyksbonde het jaarliks teen mekaar gespeel om ’n sterk span vir die uniale toernooi saam te stel.