NCHOCHO IS NUWE HOOF
Mnr. Tshokolo Nchocho ( voormalige groephoof van die Suid-Afrikaanse afdeling van die Ontwikkelingsbank van Suider-Afrika, is die nuwe uitvoerende hoof van die Land Bank.
Die Kabinet het sy aanstelling en dié van die direksie van die Land Bank goedgekeur onderworpe aan die “verifikasie van hul kwalifikasies”, sê mnr. Jeff Radebe, Minister in die Presidensie.
Nchocho, ook bekend as TP, neem die leisels oor by mnr. Phakamani Hadebe wat die bank (voorheen besaai met korrupsie en groot finansiële probleme) bestuur het tot een wat finansieel stabiel is om die landbougemeenskap te kan dien.
Hadebe het as tussentydse uitvoerende hoof by die bank aangesluit nadat dit in Julie 2008 onder administrasie geplaas is en deel van die Tesourie se verantwoordelikhede geword het. Nchocho het in 2002 by die Ontwikkelingsbank aangesluit en was sedert April 2010 die bank se groephoof.
Die Kabinet het ook aangekondig dat prof. Mohammad Karaan, lid van die Nasionale Beplanningskommissie en dekaan van die departement landbouwetenskappe aan die Universiteit Stellenbosch, en me. Susan Lund, ’n bestuurder by Transnet, heraangestel is as direksielede van die bank. Mnr. Mabotha Arthur Moloto, voorsitter van die Regering se pensioenfonds, is as die voorsitter aangestel. Die ander lede is me. Njabulo Zwane, groephoof vir landbou-ontwikkeling by Illovo Sugar, en me. Dudu Hlatshwayo wat in die direksie van die Openbare Beleggingskorporasie (OBK) dien.
Die volgende wysigingswette is ook deur die Kabinet goedgekeur om by die Parlement ingedien te word: Dié op planttelersregte, dié op die beskerming van gedresseerde diere en dié op plantverbetering. – JOYLENE VAN WYK
foto),
Een van die eerste huise in Port Elizabeth wat met ’n fotovoltaïese stelsel toegerus is. Die elektrisiteit wat deur die sonpanele opgewek word, word bedags in die kragnetwerk van die munisipaliteit ingevoer. Saans as die inwoners tuis is, word krag weer aan die stelsel onttrek. ’n “Slim meter” word gebruik om te bepaal hoeveel krag in die stelsel ingevoer is en hoeveel weer onttrek is. Die Nelson Mandelabaai-metropool is een van die eerste munisipaliteite wat só ’n stelsel goedgekeur het.