ALLE PAAIE LEI NA HEIDELBERG SE 70STE
’ N HOOGTEPUNT op vanjaar se landboukalender in die SuidKaap is die 70ste Heidelbergse landbouskou wat vanaf 6 tot 14 Februarie op dié Wes-Kaapse dorp plaasvind.
Boere van oral kom al die afgelope sewe dekades byeen om aan die skou deel te neem. Mnr. Vic Brand, voorsitter van die skougenootskap, sê vanjaar se geleentheid gaan “werklik iets besonders bied vir boere, diereliefhebbers en die breë gemeenskap”.
Toptelers van die Oos- en Wes-Kaap gaan onder meer op die Kaaplandse Holstein-kampioenskapskou teen mekaar meeding. Die Suid-Kaapse Jerseykampioenskapskou word ook gehou. Dit lok gewoonlik telers van so ver as Porterville in die Wes-Kaap en Humansdorp in die Oos-Kaap. Albei dié skoue vind Donderdag 12 Februarie om 8:00 plaas.
Die SA Merino Classic-kampioenskapskou begin Woensdag 11 Februarie om 14:00 in die BKBskaapring. “Ons verwag dat die standaard van die inskrywings baie hoog sal wees aangesien dié kompetisie Suid-Afrika se top-Merinotelers sal lok,” sê Brand.
Die nasionale wolvagkompetisie sal terselfdertyd aangebied word. BKB se wolbeamptes beoordeel die lengte, skoonopbrengs, tipe en mikron.
Daar is ook ’n slaglamkompetisie. Die karkasse sal opgeveil word nadat die wenners op 13 Februarie aangekondig is.
Die perdeskou begin Woensdag 11 Februarie om 14:00 met die beoordeling van onder meer Walliese Ponies, Hackney-, Fries-, Vlaam- en Saalperde.
Die F NB Tuinroete Hackney-streekskompetisie begin ook op die landbouskou.
Die volledige program is op die Facebookblad “Heidelberg Western Cape”.
’n Gereelde dosis wurmtee help saailinge beter groei, veral tydens hitteen droogtestres. Wurmtee is ’n organiese, vloeibare aftreksel van vermikompos, wat gevorm word as erdwurms afvalmateriaal komposteer. Die vermikompos sluit erdwurm-mis en ander afgebreekte organiese materiaal in.
Die aftreksel bevat proteïene, vitamiene en mikro- en makro-elemente soos stikstof en magnesium, verduidelik prof. Johannes van Staden, hoof van ’n span navorsers van die navorsingsentrum vir plantegroei en -ontwikkeling aan die Universiteit van KwaZulu-Natal, Pietermaritzburg.
In reaksie op boere se soeke na omgewingsvriendeliker bemesting vir tamatie-saailinge het hy en sy span die uitwerking van wurmtee-toedienings op saailinge by verskillende temperature en waterstresvlakke ondersoek. Hulle het saailinge in die een stel eksperimente aan verskillende temperature blootgestel en hul groei met en sonder wurmtee gemeet. In die tweede stel eksperimente is die saailinge met verskillende hoeveelhede wurmtee-oplossing behandel.
Teen die laer temperature het die saailinge wat wurmtee gekry het, beter gevaar as dié wat nie tee gekry het nie. Die beter groei was die duidelikste by die saailinge wat teen 30 ºC gehou is. Die waterstres-eksperimente het ’n soortgelyke resultaat opgelewer: Die saailinge wat met wurmtee behandel is, het veel beter gevaar as hul eweknieë wat dit nie gekry het nie. Minder water kan dus gebruik word om steeds puik saailinge te produseer, sê die navorsers.
Pous Franciskus het onlangs twee donkies en twee mandjies vol donkiemelk-babapoeier vir die Vatikaan se kinderhospitaal persent gekry. By die geleentheid het hy vertel hoe hy as kind gereeld donkiemelk gedrink het.
Die verslae van prysneigings is van Agrimark Tendense (AMT) ontvang. Let daarop dat 2/ 1/2015 se vleispryse voorlopig is. As besturende direkteur van Aginfo, handeldrywend as AMT, koördineer prof.