KALSIUM, BOOR IS SONSKERM VIR APPELS
Tot 20% van Golden Delicious-appels, die gewildste appelkultivar in die aantreklike Nigeriese mark, en 40% van Granny Smithappels kan weens sonbrandskade nie uitgevoer word nie. Dié skade kan nou verhoed word deur die bome met ’ n mengsel van kalsium en boor te bespuit.
Voorheen het boere probeer om sonbrand met skadunette, opleistelsels en die toediening van kaolienklei te probeer beperk, maar wisselende sukses daarmee behaal.
Drs. Elmi Lötze en Lynn Hoffman van die departement hortologie aan die Universiteit Stellenbosch het byna toevallig uitgevind ’n mengsel van kalsium en boor is ’n goeie sonbrandmiddel vir appels. Elmi wou aanvanklik kyk of ’n kommersiële produk wat kalsium bevat, en wat saam met en sonder boor toegedien word, bitterpit by Golden Delicious-appels kon beperk.
Ná die eerste seisoen was sonbrand die helfte minder by die bome wat met die kalsium- en boorkombinasie bespuit is teenoor bome wat net met kalsium of net boor behandel is. Die proef, op die plaas Queen Anne in die Vyeboom-omgewing, is die volgende jaar herhaal en die gunstige resultate is weer gevind.
Die mengsel ( kommersieel is dit as ’ n Manni- Plex- formulering beskikbaar) is as blaarbespuiting toegedien. Die bome is van week drie tot tien weke ná volle blom bespuit.
Boor help om plante se selwande en -membrane te versterk, verbeter kalsiumopname en stimuleer blomplante se stuifmeelbuise om te groei. Elmi vermoed boor werk as sonbrandmiddel omdat die mineraal ook anti- oksidante vrystel. Só beskerm dit die plasmamembrane teen skade wat oksidatiewe vrye radikale aan vrugte kan veroorsaak.
“Die voorkomende gebruik van ’n blaarbespuiting van boor en kalsium kan vooroesverliese betekenisvol verminder,” sê Elmi. “Dit is ’n volhoubare, omgewingsvriendelike en bekostigbare alternatief om die alomteen- woordige, ernstige probleem van sonbrandskade in die boord aan te pak.”
Lynn sê nog navorsing is nodig. “Ons weet nog nie hoe die kalsium- en boorkombinasie werk nie, teen watter konsentrasie die beste resultate gelewer gaan word of wanneer die ideale tyd vir aanwending is nie.”
Dié bevindinge is onlangs in die Journal of Horticultural Science & Biotechnology gepubliseer. –