HOU BY MET WÊRELDNEIGINGS
Ermelo Musgrave-gewere is al na Denemarke, Australië en Rusland uitgevoer en planne is gereed om ook na die enorme Amerikaanse mark uit te voer.
Mnr. Frik du Plooy het onlangs gehoor die patentreg op die unieke ontwerp van Musgravekolwe is in Amerika, Europa en Suid-Afrika aan sy onderneming toegestaan.
“Dis ’n prestasie en ’n eerste vir die land se wapenbedryf.”
Volgens Frik is die geheim van Ermelo Musgrave se sukses sy 46 personeellede wat vasberade is om by te hou met internasionale neigings in wapenproduksie. “Ons het meer as 300 jaar se ondervinding onder een dak. Ons bly op die hoogte van nuwe ontwikkelings in die mark deur reg oor die wêreld te toer, en ons pas vinnig aan,” sê hy.
“Almal wat hier werk, is soos familie. Ons is baie geheg aan mekaar.”
Frik sê verder hulle maak nie net topklas gewere nie, maar elke Musgrave-wapen – waarvan verreweg die meeste deur die Du Plooys se Wildman Hunting & Outdoor-winkels bemark word – kry ’n sertifikaat wat die besonderhede van die wapen aandui, waaronder die wapensmid én die koper se besonderhede. Dit is om seker te maak dat elke Musgrave-geweer individueel gewaardeer sal word deur toekomstige geslagte. “Jy koop ’n geweer vir ’n leeftyd; nie sodat jy dit volgende jaar weer kan verkoop nie.”
Een van die hoofoorwegings vir die ontwikkeling van die Musgrave Varminterreeks is dat daar deesdae mense is wat wapens koop wat glad nie jag nie, maar aan skietkompetisies deelneem.
“Vir hulle is dit nie meer ’n bloedsport nie. Dit gaan oor akkuraatheid,” sê mnr. Dirk du Plooy.
Tog wys hy vinnig daarop dat die Varminter nie net vir sportskuts bedoel is nie, maar ook vir jagters ’n hoogs akkurate en robuuste wapen is – ’n vergestalting van die benadering van die Ermelo-Musgraveinisiatief om die behoeftes van die sport- en jagwêreld in sy gewere byeen te bring.
Daarom is dit afgesien van die volledig verstelbare Timney-snellers en ’n gerieflike 45-grade-veiligheidsknip (terloops, albei dié kenmerke is standaard op alle Musgravegewere) die Varminter se gelamineerde kolf wat ’n groot bydrae lewer om die geweer stabiel – en dus meer akkuraat – te maak, sê mnr. Gary Barnes.
“Die Varminter-kolf met laminering is stabieler, want wanneer die houtvelle gelamineer word, word dit só geplaas dat die grein in teenoorgestelde rigtings loop sodat die een téén die ander werk en die kolf stabiel en reguit gehou word,” verduidelik hy.
Verder word die kolwe, wat in die kleure Nutmeg, Camo en Black Pepper beskikbaar is, gekenmerk deur ’n plat onderkant naby die punt van die kolf. Dit verskaf ’n stabiele platform van waar jy kan vuur.
Die Varminter word ook gekenmerk deur Musgrave se langer 26 duim-lope wat ook swaarder is as lope van bekende Europese gewere.
“Suid-Afrikaanse jagters verkies ’n vuurwapen met ‘n effens swaarder loop,” sê Gary. “Dit help baie om akkuraat te skiet.” Laastens is daar drie gleufies aan elke kant van die kolf wat help met eweredige afkoeling wanneer oormatige skiet nodig is, byvoorbeeld met sportskiet of gedurende operasies om wild uit te dun.
1. ’n Reeks voltooide gewere in die Musgrave-fabriek op Ermelo. Verskeie Musgrave-modelle en kalibers is beskikbaar, waaronder Field, De Lux, Sporter, Exhibition en Varminter. 2. Alle Musgrave-gewere het die bekende en betroubare K98 VZ 24 Mauser-aksie as basis. 3. Mnr. Dirk du Plooy. “Dit gaan alles daaroor om kanse te waag,” sê hy oor die sukses van die Musgrave-inisiatief. “As jy nie kanse waag nie, gaan jy nie resultate sien nie.” 4. Geweerlope in die Musgrave-fabriek in Ermelo, Mpumalanga.