Inmaakvrugte: Wêreldtekorte, puik gehalte goeie nuus vir SA
Hoewel die plaaslike verbruik van ingemaakte vrugte redelik staties is, is daar puik internasionale groeimoontlikhede, asook in Afrikamarkte, soos Nigerië, Angola en Zambië. In dié stadium gaan 85% tot 90% van Suid- Afrikaanse ingemaakte vrugte na internasionale markte, terwyl die res plaaslik verbruik word. Die goeie nuus is dat die vraag wêreldwyd tans groter is as die aanbod weens swakker oeste in die meeste van die lande wat met Suid-Afrika meeding. “Dié situasie behoort in volgende 12 maande tot 18 maande voort te duur,” sê mnr. Wiehahn Victor, hoofbestuurder van die Inmaakvrugte-produsentevereniging (IPV).
Wiehahn het op ’n inligtingsvergadering op Worcester gesê die prentjie word verder opgehelder deur die gunstige wisselkoers wat uitvoer baie bevoordeel.
“Voedselsekerheid is wêreldwyd ’n gonswoord vanweë groeiende bevolkings en ’n groter vraag na kos.” Die markvraag na ingemaakte vrugte lyk baie gunstig op kort en mediumtermyn, ook danksy ’ n ekonomiese vennootskapsooreenkoms (EPA) wat waarskynlik vanjaar gefinaliseer en in 2016 in werking gestel sal word. Dit behoort die plaaslike bedryf van 2016 af te bevoordeel.
Die ooreenkoms sluit meer lande in as die Suider- Afrikaanse Ontwikkelingsgemeenskap en betrek ook Mosambiek en Zimbabwe. Dit word gesluit met 28 lande van die Europese Unie (EU). “Van die voordele sal onder meer wees dat Suid-Afrika laer uitvoertariewe na die EU sal betaal op ingemaakte vrugte,” sê Wiehahn.
“Die Suid- Afrikaanse inmaakbedryf het homself oor die jare gevestig as dié inmaakvrugtebedryf ter wêreld wat gehalte betref. China, met sy 1,3 miljard mense, voer tot 80% van sy ingemaakte perskes uit Suid- Afrika in, ondanks die feit dat dié land dit elders goedkoper kan aankoop. “En dit is hoofsaaklik danksy die Suid-Afrikaanse produk se puik gehalte,” sê Wiehahn.
‘OORLOG’ TUSSEN AMERIKA EN RUSLAND SPOEL OOR NA SA
Alles is egter nie nét rooskleurig nie. “Die stadige ekonomiese herstel in ontwikkelde lande, veral in die EU, veroorsaak ekonomiese onsekerheid wat nadelig inwerk op bedrywe, soos die inmaakvrugtebedryf. Groot en aanhoudende produksiekostestygings het ook ’ n baie ongunstige uitwerking op die bedryf,” sê Wiehahn.
“Tog gaan dit tans goed met die bedryf, en die wêreldwye vraag na en aanbod van ingemaakte vrugte, verpulpte vrugte én puree is goed in balans, tot voordeel van die produsent.”
Hy voorsien geen prysverlagings of dramatiese verhogings in die afsienbare toekoms nie. Die vraag na perskes, pere en vrugtekelkie- mengsel is goed, en selfs appelkose “is besig om effens deur die dip te kom”.
Die vooruitsig vir plaaslike
inmaakvrugteboere lyk goed. Die voorraad ingemaakte vrugte is wêreldwyd laag en sal waarskynlik nog ’n jaar lank so bly. Danksy die puik gehalte is dié Suid
Afrikaanse produkte boonop oral gesog – soveel so dat China grootliks
net Suid-Afrikaanse ingemaakte vrugte invoer, sê mnr Wiehahn Victor, hoofbestuurder van die Inmaakvrugte-produsente
vereniging (IPV).