Boer sonder grond: Begin klein en mik dan groot
Die twee grootste oorsake vir mislukkings in die Suid-Afrikaanse hidroponiese bedryf is bemarking en onkunde. Om ’ n gevorderde hidroponiese aanleg op kommersiële skaal op die been te bring, verg groot kapitaal. Daarom moet hidroponiese beginners liewer eers eksperimenteer en ’n paar tegnieke bemeester voordat hulle groot projekte aanpak.
My onderneming het onlangs ’n eksperimentele stelsel gevestig. Die doel daarvan is om dit vir Suid-Afrikaners moontlik te maak om met drie hidroponiese tegnieke (voedingstoffilmtegniek, vloed-en-dreineerstelsel en die gruisbedstelsel) te eksperimenteer. Vir tuiskwekers en mense wat in hidroponika belang stel, is dit ’ n goeie manier om jou hidroponiese vernuf te toets. Jy kan ook jou kommersiële potensiaal bepaal.
Met hierdie tegnieke kan jy byna enige soort plant kweek. Die vloed- en- dreineerstelsel laat jou toe om saailinge te maak met produsenteskuim, klipwol of ander groeime- diums. Jy kan dan met verskillende saailinge, planttegnieke en groeimediums speel.
Gebruik kratte met gaatjies in die bodem en mediums, soos vermukeliet, perliet of gruis, om die gruisbedtegniek toe te pas. Dit is veral geskik vir knolgewasse soos uie, beet en wortels.
Die voedingstoffilmtegniek is nuttig vir slaai, spinasie, komkommers, kruie, eiervrugte, soetrissies, brandrissies, skorsies, pampoengewasse, waatlemoene en blomme.
Sodra jy weet watter gewas die beste presteer, kan jy verskillende kultivars se potensiaal begin toets. Plant dan net daardie gewas en bepaal jou produksiepotensiaal per plant en per vierkante meter.
Dit behoort ’n goeie aanduiding te gee van jou stelsel se moontlike kommersiële potensiaal. Die plante moet wel aan min of meer dieselfde omgewing en toestande blootgestel word as wat die geval in kommersiële toestande sal wees.
Wynand Bezuidenhout is die baasbrein agter Grow Machines se hidroponiese stelsels. BO: Met ’n gekombineerde hidroponiese stelsel soos hierdie kan beginners met drie verskillende stelsels eksperimenteer en uitvind wat die beste in hul omgewing gaan werk. LINKS: Groeimediums is een van die veranderlikes waaroor ’n mens duidelikheid moet kry. Op die foto is saad in produsente-skuim geplant.
Slyp jou hidroponiese vaardighede eers met kleiner stelsels voordat jy besluit om ’n groot, duur kommersiële projek aan te pak. Sodra jy weet watter gewas die beste presteer, kan jy verskillende kultivars se potensiaal begin toets.