GROND OP ALMAL SE LIPPE
REEDS vroeg in die nuwe jaar is dit duidelik dat grond vanjaar ’n belangrike politieke speelbal gaan wees waarmee steun in die aanloop tot die munisipale verkiesing gewerf gaan word.
Pres. Jacob Zuma het op die ANC se verjaarsdagvieringe dit duidelik gestel dat daar vanjaar ’n wet aanvaar moet word om grondonteiening moontlik te maak sodat “grond aan ons mense teruggegee kan word”.
Op die EFF se kongres in Desember in Bloemfontein het mnr. Julius Malema lede van sy party aangemoedig om grond oral te beset. Op dieselfde geleentheid het die EFF se kommissie oor grond- en landbouhervorming die onteiening van grond sonder vergoeding bevestig as een van die sewe pilare waarmee die “ekonomiese vryheid” van veral swart Suid-Afrikaners bewerkstellig moet word. Dan wil die EFF met ’n veldtog (Bring terug ons grond) begin en wil hy hê ’n grondoudit moet onmiddellik gedoen word.
Dit alles voorspel niks goeds vir eiendomsreg nie. Hoewel die klem nou op landbougrond is, beteken dit nie dat ander vorme van eiendomsreg nie ook in die gedrang gaan kom nie. Daar is reeds met voorgestelde wetgewing begin om intellektuele eiendomsreg ook af te water.
’n Desperate Regering sal alles moontlik doen om aan bewind te bly. Die EFF sal alles moontlik doen om meer steun te werf. Vir albei is daar ’n vrugbare teelaarde in arm, werklose, landelike gemeenskappe wat na enige strooihalm om ’n beter lewe sal gryp. Hulle het geen begrip van die vernietigende uitwerking wat dit op die ekonomie sal hê nie.
Nugterdenkendes sal moet begin om meer en beter planne te beraam vir die beskerming van eiendomsreg. Ordelike, sinvolle grondhervorming met vergoeding moet gesteun word, maar radikale optrede moet deur die burgerlike samelewing teengestaan word.