Flink polisiewerk geloof
DIE spoedige optrede deur die Vrystaatse polisie ná die jongste vlaag van moorde het lof van die slagoffers se naasbestaandes en belanghebbendes in die landbou ontlok. Vyf verdagtes tussen 19 en 25 jaar oud het in die hof verskyn ná hul inhegtenisneming binne enkele dae ná die voorvalle.
In die geval van me. Martie Bester (68), wie se verbrande lyk op die plaas Elfbloem naby Theunissen aangetref is, word twee inwoners van die dorp aangehou.
Inligting van die gemeenskap het ook gelei tot die spoedige inhegtenisneming van drie mans ná die skietdood van mnr. Toon en me. Rienie Swanepoel van Bainsvlei, wes van Bloemfontein.
Lt.-genl. Simon Mpempe, die Vrystaatse polisiekommissaris, het die plaasgemeenskap geloof vir die samewerking met sy lede tydens die ondersoek.
Mnr. Bheki Cele, Adjunkminister van Landbou, Bosbou en Visserye, het lof gehad vir die polisie se vinnige reaksie op talle plaasmoorde sedert die begin van die jaar.
Agri SA het in ’n persverklaring gesê die aard van die misdade wys dat dit nie met enkelvoudige oplossings reggestel kan word nie. “Daarom is optrede dringend nodig om dié neiging te stuit.” Die organisasie het die polisie bedank wat die beweerde misdadigers aangekeer het. “Tog bevestig huidige omstandighede die noodsaak vir ’n doeltreffende polisiemag wat die landelike beveiligingstrategie met die nodige erns toepas,” lui die verklaring.
Mnr. Tommie Esterhuyse, voorsitter van Vrystaat Landbou se komitee vir reg en orde, het landbougemeenskappe gevra om hulself te beveilig en meer paraat te wees om voedselsekerheid te verseker.
“In baie gevalle onderneem boere eiehandig patrollies omdat die polisie nie beskikbaar is om hulle te vergesel nie,” sê hy. Hy is bekommerd dat dit daartoe kan aanleiding gee dat boere die reg in eie hande neem.
Mnr. Henk Vermeulen, hoofbestuurder van Vrystaat Landbou, sê landelike veiligheid is ’n probleem wat jaarliks ’n al hoe groter probleem word.
DIE RASKWESSIE
Cele het op ’n perskonferensie gesê ras moet uit die kwessie van plaasmoorde gehaal word.
“Die mense wat doodgemaak is, is boere. Of hulle wit, swart, geel, groen of pers is – ons sien boere wat aangeval word en ons benader dit so.”
Die konferensie het eintlik oor bek-en-klouseer gehandel, maar joernaliste het Cele en minister Senzeni Zokwana herhaaldelik gevra of hulle plaasmoorde ernstig opneem en wat hulle daaraan doen.
Albei het gesê hul departement se magte is beperk en dat plaasmoorde op ’n punt die verantwoordelikheid van die polisie word. Cele het gesê uit ’n landbou-oogpunt word plaasmoorde beslis as ernstig beskou.
Hy het gesê meer harmonie moet in plaasgemeenskappe bewerkstellig word deur die skep van forums waarin boere, plaaswerkers en gemeenskappe rondom plase dien.
Cele het gesê goeie verhoudinge tussen boere en plaaswerkers is nodig asook vinnige reaksie van die polisie. – JOHAN NORVAL
en CARIEN KRUGER