IN ’N BLIK BREË GLIMLAGTE OOR GRONDPLAN
Dit is nie aldag dat kommersiële boere mnr. Senzeni Zokwana (middel), Minister van Landbou, Bosbou en Visserye, en Gugile Nkwinti (regs), Minister van Landelike Ontwikkeling en Grondhervorming, so gelukkig sien wanneer daar grondsake gepraat word nie. Maar dit is juis wat ’n groep boere van die Witzenberg (Ceres, die Koue-Bokkeveld, Wolseley, Tulbagh, Breërivier-Noord en die Ceres-Karoo) reggekry het toe hulle op 6 Januarie hul grondhervormingsplan aan die Regering voorgelê het. Boere, die munisipaliteit Witzenberg en die gemeenskap het die Witzenberg-vennootskap begin. Dié vennootskap wil bykans 50 bemagtigingsprojekte op 4 200 ha se vrugte- en groentegrond begin. Dit sal volgens die PALS-raamwerk, waarmee mnr. Gerrit van Vuuren (links), ’n plaaslike prokureur, vorendag gekom het, geïmplementeer word. PALS staan vir Partnerships in Agri Land Solutions. Dit neem al die probleme en mislukkings van vorige grondhervormingsmodelle in ag en bied ’n genuanseerde oplossing vir grondhervorming. Die projekte word boonop ondersteun deur bemagtigingsplanne vir die landbouwaardeketting en maatskaplikekonomiese opheffingsprojekte vir die gemeenskap (soos opleidingsgeriewe, behuisingsprojekte en jeugprojekte). Dié plan is deur Nkwinti as “briljant” beskryf. Twee loodsprojekte is reeds suksesvol aan die gang. Die Witzenberg produseer byna ’n derde van Suid-Afrika se appels en pere (veral vir die uitvoermark) en meer as die helfte van die land se nektariens. Die gebied se jaarlikse bruto produksiewaarde is meer as R2 miljard, met buitelandse valuta-verdienstes van sowat R1,5 miljard. Groenteproduksie is net so belangrik in die streek en bykans 22% van Suid-Afrika se uie word daar geproduseer. Vir ’n eksklusiewe artikel oor dié grondoplossing, moenie Landbouweekblad van 30 Januarie misloop nie. FOTO: VERSKAF.