Navorsers, tegnici en agente hier opgelei

LANDBOUVOORLIGTING bestaan byna nie meer in Suid-Afrika nie, veral nie vir kommersiële boere nie. Daarom is gewasboere toenemend afhanklik van private raadgewers om inligting te bekom.

“Daar is meer as 800 van hulle in die bedryf en ’n groot persentasie het die ervaring, maar nie die regte kwalifikasies nie,” het dr. Charlie Reinhardt, dekaan van Villa Academy, gesê op die bekendstelling van dié opleidingsinstansie se kort kursusse vir vanjaar. Dit is gemik op tegnici, veldwetenskaplikes en verkoopsagente.

“Die landbou-omgewing verander. Boere raak minder, maar groter en moet doeltref- fender wees. Plaaslik vind ons daar is groter druk op die tradisionele opleidingsinstellings om internasionaal relevant te raak, maar is ons nog relevant met plaaslike kundigheid?”

Die Villa Academy het in die plaaslike chemiese bedryf ontstaan. “Daar is ’n probleem om plaaslike mense op te lei, maar niemand doen iets daaraan nie.”

Die instelling, met 28 dosente, bied sowat 29 kort kursusse per jaar aan. Dit word in Kempton Park en Somerset-Wes aangebied.

Villa Academy het ook onlangs Chenin blanc-, Sauvignon blanc-, Cabernet Sauvignon- en Merlot-wingerd by die Hoogeind-opleidingsentrum in Somerset-Wes aangeplant. Die wingerd is bedoel vir proewe in die wingerdboukursus wat dr. Eben Archer aanbied, maar sal ook vir die bereiding van wyn gebruik word. Die opbrengs uit wynverkope sal in die Pneumatix-program teruggeploeg word. – LUCILLE BOTHA