GM AARTAPPEL MAAK NUUS
’n Nuwe GM aartappel maak opslae in Amerika nadat die wegneemete-reus McDonald’s onder verbruikersdruk geswig het en aangekondig het dat hy nie dié kultivar gaan gebruik nie.
Die Innate- aartappel is die afgelope dekade deur J.R. Simplot, een van die wêreld se grootste agribesighede en McDonald’s se voorste aartappelverskaffer, ontwikkel.
Die Amerikaanse landboudepartement het onlangs goedkeuring gegee vir die kommersiële verbouing van die nuwe kultivar, wat die gene van ’n wilde aartappelsoort bevat. Volgens J.R. Simplot kneus en verbruin Innate- aartappels sowat 40% minder in die oes- en opbergingsproses, en bevat dit laer vlakke asparagien, ’n chemiese middel wat moontlik kanker veroorsaak as aartappels gebraai word en dit in die middel akrilamied omgeskakel word.
J.R. Simplot beraam dat die jaarlikse vermorsing van aartappels net die Amerikaanse voedseldiensbedryf alleenlik danksy Innate met omtrent 400 miljoen pond ( meer as 180 ton) verminder sal kan word. Verbruikers sal ’ n beraamde 3 miljard pond ( oor die 1 360 ton) aartappels minder hoef weg te gooi omdat dit sleg geword het.
Die maatskappy is glo nie té bekommerd oor die McDonald’s-aankondiging nie omdat hy in elk geval eerder met die nuwe kultivar na die varsproduktemark mik, onder meer in pakkies vars gesnyde skyfies, soos vars appelskyfies ook deesdae verkoop word.
Die mikpunt is om vanjaar eers proeflopies in ’ n paar toetsmarkte te doen. – MARLEEN SMITH