ANDER KYK OOK NA AFRIKA AS MELKMARK

AFRIKA bied groot uitvoergeleenthede vir Suid-Afrikaanse melkprodukte. Plaaslike ondernemings sal egter vinnig moet optree omdat multinasionale suiwelmaatskappye reeds hulself op die vasteland begin vestig het, sê dr. Koos Coetzee, hoofekonoom van die Melkprodusente-organisasie (MPO).

Vir groter uitvoer is groter produksie nodig. Dit terwyl verlede jaar se produksie tot die lente min gegroei het en uitvoer effens gedaal het.

In die eerste tien maande was die totale produksie slegs 1,5% hoër as in die ooreenstemmende tyd die vorige jaar. Coetzee sê boere sal meer produseer indien die verhouding tussen die produsenteprys en die voerprys gunstiger word.

Die daling in internasionale pryse het intussen daartoe gelei dat invoerpariteit laer as plaaslike produsentepryse is, wat tot groter invoer kan lei.

Volgens Coetzee beperk twee faktore die moontlikheid van groter invoer. “Uit die invoerstatistiek sien ’n mens dat Suid-Afrikaanse invoerders meer as die gekwoteerde wêreldpryse vir produkte betaal, en tweedens is dit baie duidelik dat die rand verder gaan verswak, wat beteken invoerders sal meer in rand vir produkte moet betaal.” – CARIEN KRUGER

Die slagplaasverkoopsprys van bevrore braaihoenders was 1,2% (28c/kg) hoër teenoor die vorige week en 3,1% (68c/kg) hoër teenoor die ooreenstemmende week ’n maand gelede. Die gemiddelde prys van vars braaihoenders was 1,3% (31c/kg) hoër teenoor die vorige week en 2,9% (67c/kg) hoër teenoor die ooreenstemmende week ’n maand gelede. Die prys van bevrore braaistukke was 2,1% (41c/kg) hoër teenoor die vorige week en 4% (77c/kg) hoër teenoor ’n maand gelede. Die prys van bevrore braaihoenders was op ’n jaargrondslag 21,3% (402c/kg) hoër, dié van vars braaihoenders was 19,2% (377c/kg) hoër en dié van bevrore braaistukke was 23,5% (379c/kg) hoër. Die prys van bevrore braaihoenders en bevrore braaistukke kan opwaarts beweeg en dié van vars braaihoenders sy- of afwaarts. Die gemiddelde prys van speenkalwers (190 kg-240 kg) was 2% (41c/kg) hoër teenoor die vorige week en 2% (41c/kg) hoër teenoor die ooreenstemmende week ’n maand gelede. Die gemiddelde “plaashekprys” was R20,71/kg. Die gemiddelde prys van klas A2/A3beesvleis was 0,2% (6c/kg) hoër teenoor die vorige week en 0,4% (14c/kg) hoër teenoor die ooreenstemmende week ’n maand gelede. Die laagste prys was 2 937c/kg en die hoogste prys 3 734c/kg. Die gemiddelde prys van klas C2/C3-beesvleis was 0,6% (15c/kg) hoër teenoor die vorige week en 0,8% (22c/kg) hoër teenoor die ooreenstemmende week ’n maand gelede. Die laagste prys was 2 650c/kg en die hoogste prys 2 839c/kg. Op ’n jaargrondslag was die prys van die A2/A3’s altesame 1,1% (338c/kg) hoër en dié van die C2/C3’s was 7,8% (198c/kg) hoër. Die prys van die A2/A3’s kan opwaarts beweeg en dié van die C2/C3’s afwaarts.