DRAKRAG SPEEL ’N GROOT ROL IN HUURPRYS

Baie boere besit nie ál die grond waarop hulle boer nie en daarom word baie grond jaarliks gehuur of verhuur. Wanneer na die huur van weiding gekyk word, is daar belangrike aspekte wat die huurwaarde kan bepaal.

Weiding se drakrag (GVE/ha) het ’n regstreekse invloed op die huurwaarde. Weiding met ’n swak drakrag se grondwaarde sal gewoonlik goedkoper per hektaar wees en die huur sal dus ook minder wees.

Die verskillende soorte gras en die veldtipe beïnvloed ook die huurwaarde. ’n Plaas waar die weiding, byvoorbeeld, meestal uit indringerplante bestaan, of dele met giftige plante het, se huurwaarde sal laer wees. Dit is belangrik dat die huurder kennis neem van die verskillende soorte plante op die plaas.

Vir veral veeboere is die beskikbaarheid en gehalte van water twee van die belangrikste faktore wat huurwaarde kan bepaal. Die toestand van die infrastruktuur, soos damme, krale en drade, maak ook ’n groot deel van die huurwaarde uit. Indien die huurder die infrastruktuur moet verbeter, kan die huurwaarde laer wees. Dit sal voordelig wees om ’n kontrak op te stel waarin albei partye se koste rakende die verbeteringe van infrastruktuur uiteengesit word.

Indien ’n plaas gehuur word om met eksotiese wild te boer, sal die huur hoër wees aangesien wild se inkomste per hektaar meer is. Verder sal die bestuurswyse van die grond deur die vorige eienaar ook ’n rol speel. Indien die veld oorbewei is, sal minder huur betaal word.

Verskeie ander faktore wat die huurwaarde kan beïnvloed is afstand na die mark, kommoditeitspryse en huur aan familielede. Maar vir die huurder is dit veral belangrik om die fisieke eienskappe van die huurgrond, wat die huurwaarde bepaal, te bestudeer. — FRANCOIS HUMAN