GEEN VREDE BINNE ’N HONGER MAAG
’N BELANGRIKE beraad, waarvan elke Suid-Afrikaanse landbou-onderneming en boer moet kennis neem, is verlede week in die Duitse hoofstad Berlyn gehou.
Dit was die vierde beraad oor die landbou in Afrika wat deur die AGCO-korporasie van Amerika, saam met verskeie ander multinasionale maatskappye, soos Bayer, aangebied is. Vanjaar het dit gegaan oor vennootskappe om groei en volhoubare transformasie in Afrika te bewerkstellig.
Daar is verskeie redes waarom die beraad vir die Suid-Afrikaanse landbou belangrik is. Eerstens wys dit duidelik dat die wêreld se hoop op Afrika gevestig word om almal in die toekoms van kos te kan voorsien. “Daar is geen vrede binne ’n honger maag nie,” was die waarskuwing van oudpresident Joaquim Chissano van Mosambiek. In die volgende 40 jaar moet meer kos geproduseer word as in die hele vorige tydperk in menseheugenis. Sonder Afrika gaan dit nie gebeur nie.
Tweedens het die beraad getoon dat die wêreld se siening oor Afrika heeltemal verander het. Waar die klem voorheen op die uitdeel van aalmoese en ontwikkelingshulp gelê het, het dit nou verskuif na die landbou as ’n sakegeleentheid tot voordeel van almal. Vir talle lande in Afrika wat nie meer ingevoerde kos kan bekostig nie, maar met onbenutte hulpbronne vir voedselproduksie sit, is voedselsekerheid ’n voorrangsaak. Regerings alleen kan nie voedselsekerheid verseker nie. Sterk vennootskappe oor die hele waardeketting tussen regerings, die private sektor en ontwikkelingsagentskappe is nodig.
Derdens was die beraad ’n platform waar gewys is wat reeds met dié benadering in Afrika vermag word. Daar is reeds talle voorbeelde waar multinasionale maatskappye hul kennis en ervaring saamgegooi het om groot projekte binne Afrika te begin.
Die les vir Suid-Afrikaanse landbou-ondernemings en boere is om geleenthede raak te sien. Gryp dit aan en raak deel van dié vennootskappe.