Meganisasie moontlik met dié kultivar

PLANTTELERS, produsente én kopers was onlangs in die wingerd bymekaar om die splinternuwe arbeidsvriendelike tafeldruifkultivar Arra 15 te bekyk. Kultivars soos dié maak dit makliker vir boere om te meganiseer.

Mnr. Anton Viljoen jr. van De Doorns was die eerste plaaslike boer om dié Israeliese kultivar uit die stal van die kultivarontwikkelaar Grapa te plant.

Dit is vanjaar die eerste keer uitgevoer. ’n Proefblok is ook by mnr. Alwyn Dippenaar op Blouputs geplant.

Volgens mnr. Anton Viljoen sr. was al drie die skakels in die tafeldruifketting (die teler, produsent en die koper) beïndruk met die resultate wat hulle tot dusver verkry het.

“Ons het amper 4 000 kartonhouers van ’n hektaar gepak. Dit is buitengewoon vir só ’n jong wingerd,” sê hy.

Die volgende stap is om die druiwe te evalueer in die verspreidings- en bemarkingsketting. Kopers van die Engelse supermarkgroep Morrison’s het vir die doel na die tafeldruiwe kom kyk.

“Wit druiwe is geneig om te verbruin. As die kultivar dit nie doen nie, het ons ’n wenner.”

Die druiwe is ferm en beskik oor uitstekende eetgehalte.

Viljoen sr. sê hulle het al voor 2012 se arbeidsonrus in De Doorns begin ondersoek instel na kultivars wat minder arbeidsintensief is. Hy sê dit is ’n wêreldwye landbouneiging om te meganiseer en die vrugtebedryf spring dit ook nie vry nie.

Suid- Afrika, wat die afgelope twee jaar groot loonverhogings gesien het, raak toenemend soos Amerika waar die minimum arbeid in tafeldruifwingerde gebruik word.

“As jy vandag wingerd plant, moet dit eerstens ’n pitlose kultivar wees, want niemand eet meer druiwe met pitte nie. Dit moet ook min arbeid verg, want arbeid raak duur.”

Arra 15 voldoen aan al dié vereistes. Handearbeid word bykans in die wingerd uitgeskakel, want uitknip-praktyke is danksy die afwesigheid van onegalige korrels oorbodig.