ONTLEED GRONDWATER VÓÓR HIDROBREKING
DIE KANKERVERENIGING van SA (Kansa) het nou ook toegetree tot die stryd teen hidrouliese breking. Kenners meen daar is ’n kans dat dié proses die drinkwater op plase in die Karoo kan besmet en kanker kan veroorsaak.
Dr. Carl Albrecht, waarnemende hoof van navorsing by Kansa, sê dit is belangrik dat boere basislyn-ontleding van hul watergehalte doen. As die water dan deur hidrouliese breking besoedel word, kan die inligting wat vooraf bekom is, in die hof gebruik word. Sonder dié soort inligting het geen besmette plaas of gemeenskap ’n voet om op te staan in ’n hof nie, want om besoedeling te bewys, moet data van die drinkwater vóór en ná die proses ingedien word.
Hoewel ’ n waterontleding duur is (ongeveer R30 000), sal dit die enigste roete wees wat gevolg kan word wanneer met die ontginningsproses van skaliegas begin word.
Van die stowwe wat kanker kan veroorsaak en wat in die vloeistowwe voorkom wat vir hidrouliese breking gebruik word, is formaldehied, benseen en kristalagtige silika. Deur die hidrouliese brekingsproses word ook kadmium en lood-210 uitgelaat.
Die vraag word gevra of hidrouliese breking in die Karoo gaan lei tot ’n toename in kanker in die gebied.
“’n Mens moet altyd hoop vir die beste en jou voorberei op die ergste,” sê Albrecht. Die ergste scenario is dat ’n lekkasie in die voeringpyp ontwikkel en die kankerveroorsakende stowwe die drinkwaterbron in die Karoo bereik.
Kansa wil as onafhanklike organisasie die data van die watergehalte bêre sodat dit deursigtigheidshalwe op sy webtuiste geplaas kan word en almal toegang daartoe kan kry. Kansa werk nou saam met die aksiegroep Treasure the Karoo (TKAG).
Albei organisasies meen dat maatskappye wat die gas ontgin, die verantwoordelikheid moet dra vir die regs- en kommersiële aspekte van die ontleding van water. Hulle moet ook vir alle gepaardgaande toetse betaal.
Pres. Jacob Zuma het onlangs die wysigingswet op die ontwikkeling van minerale en petroleumhulpbronne ( MPRDA) na die Nasionale Vergadering terugverwys vir heroorweging. Zuma meen die wetsontwerp – soos dit tans daaruit sien – sal nie die grondwetlike toets deurstaan nie.
Mnr. Jonathan Deal, hoof uitvoerende beampte van TKAG, sê hoewel die wetgewing en die regulasies vir hidrouliese breking nog nie afgehandel is nie, het die Regering tog die aansoeke om na skaliegas te soek, goedgekeur.