ÁL MEER GEBIEDE KWESBAAR VIR PLAASAANVALLE
AL HOE meer gebiede word deur Afriforum en die TLU SA beskou as kwesbare gebiede vir potensiële plaasaanvalle. Genl. Chris van Zyl, assistent- hoofbestuurder van die TLU SA, sê die handhawing van die huidige vlak van plaasaanvalle, te midde van ’ n krimpende getal kommersiële boere, beteken dat plaasaanvalle pro rata toeneem.
“Dié verskynsel word bevestig deur die Instituut vir Sekerheidstudies se syfers wat in die geval van boere ’n toename van 98,8 per 100 000 mense in 2011; 120,4 in 2012 tot 132,8 in 2013 aantoon,” sê hy.
Van Zyl meen daaruit kan afgelei word dat die Suid-Afrikaanse Polisiediens se landelike veiligheidstrategie nie doeltreffend is nie, en dat in die praktyk geen voorrang aan landelike veiligheid, met spesifieke verwysing na landbouverwante misdaad, verleen word nie.
Dit is egter die pro rata-styging in plaasaanvalle wat tot onsekerheid lei, veral aangesien nuwe, kwesbare gebiede geïdentifiseer word.
Die kwesbare gebiede wat Van Zyl geïdentifiseer het, sluit in die Wallmanstal- gebied noord van Pretoria, die Ermelo-korridor in Mpumalanga (tussen Ermelo en Swaziland), Tzaneen en Vivo in Limpopo, Brits en Rustenburg in Noordwes en Bloemfontein/ Botshabelo i n die Vr yst aat. Nuwe gebiede wat geïdentifiseer is, is Vryheid, die Middelland en die Suidkus in KwaZulu- Natal en Barkly-Oos in die Oos-Kaap.
“As ek die beskikbare statistiek ontleed, kan ek nie anders nie as om twee afleidings te maak: Daar is spesifieke gebiede wat herhaaldelik deurloop, en dan is daar in sekere ander gebiede ’n voortdurend wisselende patroon van misdadigheid.
“Dit laat my glo dat ’ n veel groter gebied as hierbo genoem, blootgestel is. Daarbenewens is die vlak van aangemelde moorde al vir ’n hele paar jaar konstant, wat daarop dui dat die situasie allermins verbeter het. Dit skep onsekerheid onder ’ n aansienlik groter aantal landelike inwoners,” sê Van Zyl.