Só bestuur dié uitblinker ’n wildplaas
Me. Ellalien Davey (op die f oto) is verlede jaar as die Wildboer van die Jaar aangewys en het haar sukses opgedra aan die ondersteuning en samewerking van haar gesin.
Elke boerdery, of dit nou ’ n wild-, vee- of graanboerdery is, het ’n wenresep wat gevolg word. Romanco Ranch is sedert 2000 in sy huidige formaat ’ n wildplaas waar verskeie gewone en skaars wildsoorte aangehou word. Dit is sowat 220 km noord van Johannesburg tussen Modimolle (Nylstroom) en Mookgophong (Naboomspruit) op sowat 7 000 ha.
Die lang pad tussen die plaas en die dorp, en natuurlik vir besoeke aan die verskillende wildkampe, word in ’ n betroubare viertrekvoertuig afgelê. “Beslis Toyota en Toyota en Toyota! Om meer spesifiek te wees, ’n Toyota Land Cruiser,” sê Ellalien.
DIEREGESONDHEID
Om Ellalien se wild op haar plaas in ’ n goeie kondisie te hou, gebruik hulle lusern as ruvoer en dan ZetB se wildkorrels as byvoeding. In die somer gebruik hulle ’ n fosfaatblok en gedurende die wintermaande ’n proteïenblok as lek.
Die gesondheid van die diere op die plaas speel natuurlik ’ n belangrike rol in Ellalien se suksesverhaal. Om haar wild se gesondheid op peil te hou, gebruik sy dr. Louis Greeff van MediVet-dierekliniek op Thabazimbi se dienste.
“Vir al ons dieregesondheid, hetsy dit fisieke behandelings is of net raad wat hy ons gee oor verskillende middels wat ons moet toedien vir algemene dieregesondheid, gaan ons na hom.”
Hulle doen egter ook self ontleding van mismonsters voordat hulle die wild met ontwurmingmiddels behandel.
Teen inwendige parasiete verkies sy om middels, soos Prodose Orange, Endotape, MaxiCare, Startect, Lintex en Ivomec Liquid, te gebruik. “Ander middels vir algemene gesondheid en die bekamping van bosluise is Browse Plus, Redline, Stopatik en Dectomax.”
WILDVANG
Louis is in beheer van die meeste van hul wildvangste. “Ons doen egter die meeste van ons eie aankope en vervoer self, aangesien ons as ’n ‘translocator’ geregistreer is. Vir groter hoeveelhede wild gebruik ons Mpatamacha, aangesien sy diens en toerusting uiters professioneel is,” sê Ellalien.
Verlede jaar het die plaas sy eerste uiters suksesvolle produksieveiling gehad saam met die groep Prime Genetics, wie se veiling by Mpatamacha op Vaalwater gehou is.
“Maar,” sê Ellalien, “ons verkoop dan ook diere uit die hand deur verwysings en agente. Dieselfde geld aankope.
“Ons maak baie keer regstreeks kontak met wildboere wat ons meen die tipe diere het waarna ons op soek is. Verder koop ons graag op veilings of by agente wild waarin ons belang stel.”
Die gesondheid van haar wild is vir me. Ellalien Davey ’n voorrangsaak. Daarom gee sy hulle die regte byvoeding en medisyne.