90 JAAR GELEDE

Uit: Die Landbouweekblad, 11 Maart 1925.

VOORTREKKERLEIER SE WEDUWEE WORD 100 JAAR OUD

Mev. Pietjie Linde, weduwee van die Voortrekkerleier Andries Pretorius, het haar 100ste verjaarsdag op 25 Februarie 1925 op die plaas Wardenfield by Brandfort gevier. Sy woon daar by haar dogter, mev. A.W. Linde.

Talle mense – familielede, vriende, predikante en hoogwaardigheidsbekleërs – het die geleentheid bygewoon. Hulle het in die skadu van tien groot bokseile langs die woonhuis byeengekom en mev. Linde met haar aankoms staande toegesing “Dat’s Heeren zegen op u daal”.

Van die sprekers het daarop gewys dat mev. Linde (gebore De Lange, getroud Pretorius) ’n oorlewende is van ’n heroïese tydperk in die Afrikaner se geskiedenis. Sy het onder meer die Voortrekkers se tog oor die Drakensberg beleef.

Sy is in Augustus 1849 op Potchefstroom getroud met Pretorius (1798-1853), ’n boer en wewenaar. Pretorius was in 1838 bevelvoerder van die Voortrekkers in die Slag van Bloedrivier toe die Zoeloes beslissend verslaan is. Ná sy dood is sy met mnr. G.F. Linde, ook ’n boer, getroud.

Ouma Linde het aan die verjaarsdaggaste vertel sy was by toe Pretorius oorlede is.

“Die laaste nag het hy goed geslaap en het eers die môre om nege-uur wakkergeskrik. Ek het die heel nag voor sy bed gesit en waak. Toe hy wakker word, het hy my hand geneem en vir my gesê: ‘Pietjie, ons gaan mekaar nou verlaat’, en onmiddellik daarna is hy dood.” Ouma Linde is op 18 Januarie 1929 op 103 jaar op die plaas Schanskraal by Bloemfontein oorlede.