LANDBOUERS BEKOMMERD, MAAR BOER NOG LÉKKER
BOERE is bekommerd oor grondhervorming, eiendomsreg en arbeidsverhoudinge, maar hulle geniet dit steeds om te boer. Hulle hou daarvan om die baas van hul eie plaas te wees en tot voedsel- en veselproduksie by te dra, en dat boerdery hulle ná aan die grond bring. Dít is wat ’n peiling onder Agri SA-lede wys.
AFRIKAANS
Altesame 1 364 boere het die aanlynpeiling voltooi en 69 lede van leierskapstrukture ’n gedrukte weergawe.
Die meeste van die respondente (45%) was van die Wes-Kaap en betrokke in diereproduksie (45%) en tuinbou (31%). Hulle was oorwegend Afrikaans (79%) en tussen 45 en 64 jaar oud (59%).
Die meeste respondente (57%) se jaarlikse plaasomset is tussen R1 miljoen en R10 miljoen en slegs 3% s’n is bo R50 miljoen.
Die boere beskou grondhervorming, die hoë koste van produksiemiddele, misdaad en landelike veiligheid, ’n gebrek aan regeringsondersteuning en ekonomiese onsekerheid as hul belangrikste kwellinge.
Hulle beskryf hul medeboere as onder meer skepties, sonder selfvertroue, onseker en selfs as vermetel.
Hoewel hulle optimisties oor boerdery is, is hulle skepties en onseker oor die toekoms van die landbou in die land. Boere beskou die Regering as verdag en vyandig. Die meeste meen dat die Regering die landbou nie goed ondersteun nie (92%).
Verder meen 65% die gemeenskap besef nie hoe belangrik die landbou is nie.
SLEGTE BEELD
Boere het in die peiling gesê hulle het ’n slegte beeld in die media. Die publiek verstaan en waardeer nie die bydraes wat boere lewer nie. Meer as ’n derde het gesê Agri SA doen nie genoeg om die landbou se beeld onder verbruikers te bevorder nie.
Altesame 62% het saamgestem dat daar een inklusiewe organisasie vir alle boere moet wees en 55% verkies regstreekse lidmaatskap van ’n oorkoepelende organisasie. Sowat 62% is redelik bekend met Agri SA se werk en tussen 56% en 70% van respondente meen Agri SA het ’n goeie invloed op wetgewing en beleid wat met hul belangrikste kwessies verband hou.
Bykomende kommentaar op die organisasie wissel van dankbetuigings en ’n bevestiging dat “hande vat” nodig is, tot kritiek dat van die leiers soms te konserwatief, en die organisasie te wit en “’n klub vir ryk vrugteboere en hul voormanne ” is.
AANBEVELINGS
In ’n verslag oor die peilinge word aanbeveel dat die beeld van boere en die landbou in die media en ook onder verbruikers verbeter moet word.
Voorts moet beter verhoudinge met die Regering gekweek word. – CARIEN KRUGER
HEEL BO: Met 50 cm-rywydtes soos hier bereik min sonlig die grondoppervlak, sodat verdamping beperk word en onkruid smoor.
BO: Tand vs. kouter word ook in die plaasproewe buite Ottosdal by lede van dié distrik se geenbewerkingklub getoets. FOTO: MARLEEN SMITH