FYNBOS TEEN FUSARIUM

’n Aromatiese fynbosstruik wat wyd in die Wes- Kaap voorkom, kan die landbou- en farmaseutiese bedryf help in hul stryd teen swamme wat plante en mense bedreig, sê die plantkundige dr. Mpumelelo Nkomo.

Hy het in sy doktorale studie aan die Universiteit Stellenbosch (US) bevind goue salie, ook bekend as duinsalie ( Salvia africana-lutea), bevat chemiese stowwe wat die groei van twee spesifieke swamme in die grond kan bestry, luidens ’n verklaring van die US.

Dié swamme besmet onder meer mielies, druiwe en aspersies. Een van hulle ( Fusarium verticillioides) produseer gifstowwe wat keelkanker kan veroorsaak by mense wat besmette mielies eet.

Duinsalie kan glo ook gebruik word om hoes, verswakte seksuele vermoëns, geestesen senutoestande, keelontsteking, chroniese brongitis, tuberkulose, griep, maagpyn, diarree en veluitslag te behandel.

Nkomo het vir sy studie verskeie identifikasietegnieke gebruik om die salie se chemiese elemente en metaboliese stowwe wat teen swammme help, te identifiseer en te ontleed.

Daarmee kon hy ’ n regstreekse verband bewys tussen die plant se chemiese samestelling en sy vermoë om swamme te bekamp.

Benewens doeltreffende swambestryding is twee van die stowwe, karnosool en karnosiensuur, ook doeltreffende anti- oksidante en anti-inflammatoriese en antimikrobiese middels. Dit kom ook in roosmaryn voor.

Volgens Nkomo behoort dit moontlik te wees om die weefsel van duinsalie in die laboratorium in selle te omskep wat later vir die grootmaatproduksie van hierdie twee stowwe gebruik kan word.

– MARLEEN SMITH