Dubbelsjokolade-moutmuffins
Al ooit gewonder hoe proe die heel lekkerste, mees dekadente sjokolademuffin? Hier is hy! Die sjokolademoutballetjies wat jy binne-in die beslag sit, bak tot ’n taai, toffierige moutkaramel – dis lekker verby.
300 ml koekmeel 250 ml kakao 12 ml bakpoeier 2 ml koeksoda 3 eiers 310 ml ligbruinsuiker 125 ml olie 250 ml suurroom 125 ml melk 1 x 80 g-plak donker- of melksjokolade, gekap 24 sjokolademoutballetjies (ons het Woolworths se Chuckles gebruik), plus ekstra vir versiering
Sjokoladeversiersel (opsioneel)
500 ml versiersuiker 180 ml kakao 30 ml gesmelte botter Warm water
Voorverhit die oond tot 180 °C en voer twee muffinpanne ( met 12 holtes elk) uit met papiervormpies. Sif die meel, kakao, bakpoeier en koeksoda saam in ’ n mengbak. In ’n aparte bak, klits die eiers, suiker, olie, suurroom en melk tot net gemeng. Voeg die suurroommengsel by die droë bestanddele, saam met die sjokoladesplinters, en roer die mengsel net ’n paar keer tot die bestanddele net-net gemeng is. Skep ’n lepel vol beslag in elke papiervormpie. Sny elke sjokolademoutballetjie middeldeur en sit twee helftes bo- op elke lepel beslag in die papiervormpies. Skep nog ’n lepel beslag bo-op. (Elke papiervormpie moet ongeveer driekwart vol beslag geskep wees.) Bak vir 16-20 minute, tot die muffins uitgerys en deurgaar is. Laat vir 5- 10 minute in die pan afkoel en pak dan op draadrakke om verder af te koel tot kamertemperatuur. Sit net so voor, of maak ’n sjokoladeversiersel om bo-op te smeer: Sif die versiersuiker en kakao saam. Voeg die gesmelte botter by en dan warm water, druppel vir druppel, tot die versiersel smeerbaar is.