BRAFORDTELERS HOU WÊRELDKONGRES IN SA

’N WÊRELDKONGRES word van 15 tot 18 Maart deur SA Braford in Pretoria gehou. Me. Charlotte Schuite, voorsitter van SA Braford en van die internasionale Braford-konfederasie, sê dit is ’n belangrike geleentheid om die ras plaaslik en in ander Afrikalande te bevorder. Afgevaardigdes van ál sewe lidlande gaan die kongres bywoon, naamlik Paraguay, Uruguay, Brasilië, Argentinië, Colombia, Australië en Suid-Afrika (wat ook Namibië en Mauritius se lede insluit). Verteenwoordigers van die Suider-Afrikaanse Ontwik- kelingsgemeenskap (SAOG) is ook genooi.

Die openingsonthaal is op 15 Maart. Dit word gevolg deur twee dae se lesings deur plaaslike en internasionale kenners. Van die plaaslike sprekers is dr. Michael Bradfield (Breedplan), prof. Este van Marle Koster (Universiteit van Pretoria) en mnr. Louis van der Watt (uitvoerende hoof van die Atterbury- groep). Van die internasionale sprekers is dr. Fernando Cardoso en mnr. Fernando Lopa van Brasilië, mnr. Eduardo Martinez Ferrario van Argentinië en mnr. Stephan Lill van Australië.

Smiddae word praktiese sessies aangebied, waaronder by die Universiteit van Pretoria se Onderstepoort- kampus en die Ferpa-voerkraal by Cullinan.

Schuite sê die jeug is aktief by die kongres betrek. Braford SA het ’ n opstelkompetisie saam met die Landbounavorsingsraad aangebied waaraan studente van universiteite en landboukolleges kon deelneem.

Die wenner – wat op die kongres bekend gemaak word – ont- vang ’ n werksvakansie op ’n plaas in Suid-Amerika. ’n Junior afslaerskompetisie word ook gehou.

Jeugdiges van Suid- Amerikaanse lande kon aan ’ n fotowedstryd deelneem. Die wenner woon die kongres gratis by.

Sowat 100- 120 mense word daagliks by die kongres verwag, wat twintig buitelanders insluit. ’n Nasionale veiling word vir die eerste keer gehou. Daar is ook ’n toer voor die kongres na boerderye by Frankfort, Rosendal en Ladysmith.

Suid-Afrika het 33 Braford-telers met sowat 7 500 beeste wat op die Breedplan-stelsel geregistreer is. Ongeveer vierhonderd beesboere koop bulle by hierdie lede. – CHARL VAN ROOYEN

BESPREKINGS: Op die webblad www.stockmanschool.co.za of by Charmaine Alberts, tel. 051 8211783 of e-pos palberts@telkomsa.net.