Word ’n ‘vleismeester’
NET omdat iemand ’n rooivleisboer is, beteken dit nie hy/sy weet alles van vleis af nie. Daarom gaan boere wat vanjaar die Vleisbeesskool op Aldam bywoon, ’n kursus doen waar hulle meer van die fynere puntjies van vleis geleer word.
Die reëlings vorder fluks vir vanjaar se Vleisbeesskool op Aldam in die Vrystaat wat vanaf 14 tot 16 Oktober deur Landbouweekblad, Breedplan en die Lewendehawe-registrerende Federasie aangebied word. Die tema is ‘Vleis en Reproduksie’.
Dr. Michael Bradfield, hoof van Breedplan Suider-Afrika, sê ’n meester-vleisproekursus vir die mense op die vleisbeesskool gaan onder leiding van dr. Phillip Strydom, navorsingspanbestuurder oor vleiskunde by die Landbounavorsingsraad, by Sparta se vleisverwerkingsaanleg op Kroonstad aangebied word.
Bradfield sê die vleisproekursus sal soos ’n wynproekursus aangebied word. Ná die kursus gaan almal eksamen skryf en diegene wat slaag, ontvang ’n spesiale baadjie en sal hom-/haarself ’n “meester” in vleisproe kan noem. “Produsente in ander bedrywe, soos die wynbedryf, verstaan hul produk, maar min boere kan werklik die verskil tussen voerkraal- en veldvleis proe, bepaal of vleis sag of taai is en weet vleis moet eers rus nadat dit gaar gemaak is.”
Verskeie simposiums word tydens die skool aangebied, waaronder ’n simposium vir stoettelers onder leiding van die sprekers. Boere sal, soos altyd, kan kies watter lesings hulle wil bywoon, onder meer voeding, teling, bul- en koeiseleksie, weidingbestuur, dieregesondheid, ekonomiese beginsels van beesboerdery en hoe om krale vir maklike beheer op te stel.
Voorste internasionale sprekers van Amerika en Australië is genooi. “Ons leef in ’n wêreldmark en moet met die res van die wêreld kan meeding. Dit is belangrik dat kommersiële en stoetboere die basiese beginsels van vleisbeesproduksie moet verstaan om te sorg dat hulle in die toekoms mededingend kan bly. Daarom is dit belangrik om die vleisbeesskool by te woon,” sê hy.
– CHARL VAN ROOYEN