DIÉ WEEK IN DIE LANDBOU
Die hofsaak van boere teen Sasol oor samespanning in die kunsmismark, is geskik. Luidens ’n verklaring volg dié saak nadat die TLU SA se regspan in Mei 2012 namens verskeie boere ’n dagvaarding op Sasol (Chemical Industries Bpk.) beteken het vir moontlike skade wat voortspruit uit Sasol se skikking met die Mededingingstribunaal in Mei 2009. Die skikking is die grootste verbruikersregsaksie tot nog toe, wat kragtens die Wet op Mededinging, Wet 89 van 1998, ingestel is.
DIE GOOGLE-RANDE ROL
Google, die superfynwolram van mnre. Willem en Acton van Aardt van die fynwol-Merinostoetery Fairworld by Kookhuis, is teen R200 000 ver- koop. In 2011 het dié fynwolMerinostoetery ook ’n ram vir ’n rekordprys van R250 000 verkoop, in albei gevalle aan mnre. Kerneels Greyling en sy seun BP, van Wakkerstroom. Die veilingsverslag is op bl. 109.
HANE VERBOU MEESTE
Frankryk is die Europese Unie (EU) se grootste landbouprodusent, met produksie ter waarde van R937 miljard, gevolg deur Duitsland (R678 miljard), Italië (R638 miljard), Spanje (R545 miljard), Brittanje (R400 miljard) en Nederland (R355 miljard). Volgens Eurostat-data was Roemenië in die agtste plek met produksie ter waarde van R204 miljard. Dit is egter besonder laag as die grootte van dié land se landbougrond (13,3 miljoen ha) in ag geneem word. – Sofia News Agency
MUGABE ERKEN FOUT
Zimbabwe se grondhervormingsbeleid was dalk ’n fout, sê pres. Robert Mugabe. Hy het in ’n onlangse onderhoud ter viering van sy 91ste verjaardag erken dat die plase wat uitgedeel is té groot is en dat die nuwe boere nie genoegsaam toegerus is om die plase te bestuur nie. Hoewel sommige boere ’n plan beraam het en dit aan wit boere onderverhuur het, het Mugabe dié boere gewaarsku dat hulle van hul plase ontneem sal word.
‘HERSIEN GM REËLS’
Die Europese regulasies ten opsigte van geneties gemodifiseerde (GM) gewasse moet hersien word, aldus die parlementêre komitee vir wetenskap en tegnologie in Brittanje. Die komitee meen die regulasies verhinder dat voordelige gewasse verbou kan word. Die EU se regulasies aanvaar dat GM gewasse ’n groter risiko inhou as konvensionele gewasse, ondanks al die wetenskaplike getuienis dat dit nié so is nie. – The Independent
ONDEURDAGTE SYFERS
Volgens mnr. Fanie Brink, ’n onafhanklike landbou-ekonoom, is die statistiek wat mnr. Charl Senekal, die groot suikerboer, aangehaal het – dat 100 groot boere 70% van Suid-Afrika se kos produseer – foutief. Brink sê die enigste aanduiding van die totale bruto produksiewaarde van voedselprodukte in Suid-Afrika word deur die Nasionale Departement van Landbou, Bosbou en Visserye gepubliseer. Daarvolgens was die gemiddelde produksiewaarde van alle voedsel- produkte oor die afgelope vier jaar R151 miljard, en 70% daarvan beloop R106 miljard. Indien 100 boere dus hierdie voedselprodukte sou produseer het, beteken dit elke boer het gemiddeld ’n produksiewaarde van meer as R1 miljard geproduseer, waarvoor geen grondige bewyse bestaan nie.
MELKPRODUKSIE BRUIS!
Melkproduksie in Januarie was 10,3% meer as ’n jaar gelede en kan toegeskryf word aan laer graanpryse, ’n effense verhoging in produsentepryse, asook gunstiger produksietoestande, sê dr. Koos Coetzee, hoofekonoom van die Melkprodusente-organisasie (MPO). Coetzee sê boere sal egter nie Januarie se hoë produksie kan handhaaf nie omdat die droogte in somerreëngebiede reeds oeste beskadig het. Op internasionale vlak het wêreldsuiwelpryse in Desember begin styg weens laer as verwagte produksie in Nieu-Seeland.
LIG IN WAPAD DOOF UIT
Die sentrum vir trekdiere op die proefplaas van die Fort Hare-universiteit in Suid-Afrika sal einde Maart sy deure sluit nadat die Departement van Landbou glo sy finansiering onttrek het. Die sentrum, wat uniek in Suid-Afrika is, het belangrike werk verrig onder klein bestaansboere wat dikwels nie toegang tot duur en tegnologies gevorderde masjinerie het nie, maar wél tot trekdiere.