‘ANC WIL NIE WIT MET SWART BOERE VERPLAAS’

DIE

ANC sal nie sy grondhervormingsplanne op so ’n manier deurvoer dat voedselsekerheid daaronder ly nie, het mnr. Senzeni Zokwana, Minister van Landbou, Bosbou en Visserye, gesê. Voedselsekerheid bly steeds die sleutelsaak, het hy gesê.

Zokwana het dié versekering oor die grondkwessie aan boere op die kongres gegee.

Zokwana het die indruk gewek dat die voorgestelde grondplafon van 12 000 ha blykbaar nog nie ’n uitgemaakte saak vir die ANC is nie toe hy boere genooi het om met werkbare teenvoorstelle te kom as só ’n plafon hul besigheid sou seermaak. “Kom praat met ons daaroor,” het hy gesê.

Hy het wel bygevoeg dat hulle van elke kommersiële wit boer verwag om as mentor vir ’n swart nuweling- boer op te tree. Hul plig is nie net om boer te wees nie, maar ook onderwysers.

Zokwana het ’ n beroep op boere gedoen om op openbare platforms, soos die grond- imbizo’s, by onderhandelings oor grondhervorming betrokke te bly, en hul saak aan te hou stel.

Zokwana het gesê dat iemand wat sê grond moet sonder vergoeding gegryp word, nie in die Parlement hoort nie.

Hy het ook gesê sy Regering se beleid behels nie dat dié wat in die verlede bevoordeel is, nou moet betaal nie. “Ons wil nie wit kommersiële boere met swart boere verplaas nie. Op elke vergadering wat ek bywoon, is dit duidelik dat die waarde van julle wit kommersiële boere vir die land terdeë besef word, en ook dat die land julle nodig het.”

IMBIZO WAS ‘GUNSTIG’

Dít kom nadat berig is dat boere en mnr. Gwede Mantashe, sekretaris-generaal van die ANC, op die jongste grond- imbizo in Illovo, Johannesburg, sleg haaks was.

Die imbizo volg kort op die hakke van pres. Jacob Zuma se staatsrede waarin hy die grondplafon van 12 000ha as een van die maatreëls genoem het wat sy Regering gaan gebruik om grondhervorming te versnel.

Mnr. Roelf Meyer van die Transformation Initiative, een van die organiseerders, het op die Graan SA-kongres gesê mediaweergawes van wat op die imbizo gebeur het, was “totaal ver- keerd”. Die imbizo was, volgens Meyer, eerder baie gunstig. Daar is nou heelwat minder kwessies waaroor die partye verskil as voorheen, en dié verskille is ook nie onoorkombaar nie, het hy op die kongres gesê.

Zokwana het ook gekla dat beriggewing van byeenkomste wat hy bywoon, dikwels “sensasioneel” is. – MARLEEN SMITH