HOË PRYSE, GROOT DRUK VERWAG
VERWAG hoë produsentepryse, ’n selfs nóg kleiner oes en reusedruk op ons vervoerinfrastruktuur om groot hoeveelhede mielies en sonneblomme in te voer. Dít is die boodskap aan boere sedert die Nasionale Oesskattingkomitee verlede week in sy eerste produksieskatting van somergesaaides bekend gemaak het dat die verwagte nasionale mielieoes nou op net 9,67 miljoen ton staan. Dit is ’ n derde kleiner as verlede jaar se oes.
Die verwagte sonneblomoes is ook ’n derde kleiner as dié van verlede jaar en die verwagte sojaboonoes ’n aks laer, ondanks ’n sterk uitbreiding in vanjaar se aanplantings.
Graan SA het in sy reaksie op die skatting benadruk dat dit maar net ’n eerste raming is en nie ’ n scenario van opbrengste teen die einde van die produksietyd (strooptyd is eers vanaf Mei) nie. As die droogte in die komende weke voortduur, kan die oes selfs kleiner wees, wat beteken meer sal ingevoer moet word.
Die totale maandelikse behoefte aan mielies in SuidAfrika en sy buurlande Botswana, Lesotho, Namibië en Swaziland is net meer as 900 000 ton per maand. “Ons invoerinfrastruktuur sal meer as 1,5 miljoen ton koring saam met 1,65 miljoen ton mielieinvoer moet behartig. Die logistieke ergernis daarmee kan transaksiekoste verhoog en invoer selfs duurder maak, wat die beskikbaarheid van invoermielies om in plaaslike behoefte te voorsien, sal beperk,” sê mnr. Wessel Lemmer, senior ekonoom van Graan SA.
Daar i s dus min rede vir plaaslike mieliepryse om in die rigting van laer uitvoerpariteitvlak te daal, meen Lemmer. Pryse sal eerder in die rigting van invoerpariteit neig en veral in Junie, Julie en Augustus (die plaaslike oestyd) sal pryse in ’n groot mate bepaal word deur hoe flink mielies aan die mark beskikbaar gestel word.
As boere in dié tyd sou besluit om hul mielies terug te hou, kan mieliepryse vir die grootste deel van die bemarkingsjaar en tot einde Februarie volgende jaar teen die hoër invoerpariteitvlakke verhandel, meen Lemmer. –