Stamboek wil eerder praat as baklei
“ONS gaan nie betrokke raak by ’n mediageveg met die LNR nie.” So het dr. Pierre van Rooyen, hoofbestuurder van SA Stamboek, gereageer op ’n dubbelbladadvertensie wat die Landbounavorsingsraad (LNR) verlede week in Landbouweekblad geplaas het om “onakkuraathede en halwe waarhede wat in die bedryf rondloop, reg te stel”.
In dié advertensie voer die LNR aan dat mediaberigte die instansie se beeld skade doen deur eensydige beriggewing.
Van Rooyen sê die LNR het ’n brief met soortgelyke inligting ’n week vantevore aan al die telers wat aan Stamboek behoort, gestuur. “Ons het toe reeds ’ n raadsvergadering gehou en besluit Stamboek verkies om regstreeks met die LNR te praat.”
Hy sê as dit van Stamboek afhang, sal hulle verkies om die geskil tussen die twee organisasies om ’n tafel te besleg. Hy sê die hele bedryf ly onder die twee instansies se twis.
WAAR KOM DIT VANDAAN?
Die onmin het ontstaan toe die LNR vroeg in 2012 sy rekenaars waarop die Intergis- stelsel gehuisves word, uit die SA Stamboek se gebou in Bloemfontein verwyder het. Stamboek het dadelik ’ n ander stelsel, Logix, in werking gestel, maar die LNR sê die data wat gebruik word, is dié instansie se intellektuele eiendom en beskuldig Stamboek daarvan dat hy in sy nuwe liniêre, onsydige beramingstelsel (BLUP) met die LNR se kalwers ploeg en hulle boonop inspan om met die LNR mee te ding.
Die LNR het SA Stamboek verlede j aar hof toe gevat en het spoedig deurgeloop onder beskuldigings dat die instansie weens beweerde geldtekorte nie kon byhou by die tegnologie en wêreldneigings nie en dat die LNR nou belastingbetalers se geld in die hofgeding teen SA Stamboek gebruik.
In sy advertensie beskryf die LNR dié bewerings as “onwaar” en “kwaadwillig”. Die LNR sê hy poog juis om sy intellektuele eiendom, waarvan die ontwikkeling deels deur belastingbetalers gefinansier is, te beskerm.
DIE MINISTER PRAAT
Mnr. Senzeni Zokwana, Minister vir Landbou, Bosbou en Visserye, het gesê hy het met SA Stamboek vergader en ingestem om hul voorstel oor te dra dat ’n vergadering met die LNR belê moet word om die kwessie te bespreek.
“Dit is noodsaaklik dat SA Stamboek op een of ander manier voortbestaan, maar dit moenie die werk van die LNR in die wiele ry nie.” – JASPER RAATS
Mnr. Willem Goosen (links), van die NWKV, verduidelik aan ’n groep Oos-Kaapse kleinboere waarna hulle behoort te streef met wol. Die NWKV pleit om regeringshulp om meer weidingsgrond te help ontwikkel. FOTO: THEUNS BOTHA